Is Pregadorias antigas: su signo de sa devozioni - Provincia del ...

278
IS PREGADORIAS ANTIGAS - SU SIGNU DE SA DEVOTZIONI
plàxiri a Deus, non s’iscurtant is opinionis de is óminis, ne si fait contu de is resguardus
umanus; ma a Deus chi est asuba de totus is cosas, si donat cun allegria de coru
s’amori de sa preferéntzia e sa glória de su sacrifítziu.
Unu Babbunostu, tres Ave Marias, unu Gloria Patri.
Oratzioni a su Babbu Eternu
Santíssimu Eternu Babbu! Veramenti nienti si perdit candu si lassat po amori Bostu
calincunu bèni, e si fait cun coru sinceru unu sacrifítziu a Bosu. Maria consagrat a
Bosu sa Virginidadi Sua, e po plàxiri a Bosu renúntziat a s’onori de sa Maternidadi.
E po custu apuntu Bosu dh’eis a fai Mamma sa prus afortunada de totus is àteras
Mammas, e dh’eis a fecundai de unu Fillu chi nisciuna Mamma at tentu mai, ne at
a pòdiri mai tènniri, est a isciri de su Verbu Eternu Incarnau, glória Bosta e glória
de su Celu e de sa Terra. Antzis dh’eis a fai dopiamenti Mamma, poita chi candu
Issa at de su virginali sinu Suu a donai a custu mundu sa Luxi Eterna chi est s’Unigénitu
Fillu Bostu, dh’eis a costituiri ancora Mamma de totus is Fidelis e de totus is
Óminis. Est a isciri chi dh’eis a fai conservai su tesoru de sa Verginidadi ch’Issa at
elígiu, e dh’eis a donai sa fecundidadi de sa Maternidadi a sa cali renúntziat; aici
Issa at a èssiri Mamma sa prus rica de Fillus e sa prus beata, poita chi po amori
Bostu iat elígiu de abbarrai Vírgini e istérili; e cun privilégiu singulari mai prus
inténdiu, at a èssiri Mamma Vírgini e Vírgini Mamma, Vírgini innantis de su partu,
Vírgini in su partu, Vírgini apustis de su partu. O cantu magnificamenti recumpensais
Bosu su sacrifítziu chi sa Pipiedha Maria fait a glória Bosta! Nosàterus Bosi
adoraus, Bosi benedixeus, Bosi glorificaus in eternu! E imparaus chi su pèrdiri po
Bosu est guadangiai; su serbiri a Bosu est regnai.
Unu Babbunostu, tres Ave Marias, unu Gloria Patri.
Oratzioni a Maria Santíssima
Santíssima Vírgini Maria! E chini mai Bosi at postu in su coru fintzas de Pipiedha
unu votu aici insólitu, aici contràriu a is ideas e a is costúminis de su Pópulu Bostu,
cali est su votu de perpétua Virginidadi? Ah, dh’intendu! Est s’Ispíridu Santu. Issu
Bosi at elígiu e formau a Isposa Sua. E dependu èssiri similitúdini e uniformidadi
de caràtiri inter s’Isposu e s’Isposa, comenti Issu, divinu Isposu, est infinita santidadi,
puríssima luxi, brillantíssimu candori, aici bollit chi Bosu Isposa Sua siais
totu puresa, totu luxi, e candori, po èssiri digna de is grandus mistérius chi in Bosu
e po mesu Bostu at a operai. Bosu, est beru, consagrendu cun votu perpétuu sa
Virginidadi Bosta, non pensais a custas grandus operatzionis de su Divinu Ispíritu,
e mancu po umbra passant is sa menti Bosta cussas maravíglias; fueis benisí su
matrimóniu terrenu, poita chi scieis chi in cussu stadu sa fémina depit plàxiri non
solamenti a Deus ma ancora a s’Isposu, e depit tènniri po cussu su coru dividiu in
certa manera inter s’Isposu e Deus; ma Bosu bolleis cun sa prus bella perfetzioni
èssiri totu esclusivamenti de Deus, e po cussu non pensais che a Bosi ofèrriri e
consagrai irrevocabbilmenti a Issu, e a Bosi consumai po Issu comenti puríssimu
olocàustu in su secretu de sa umilidadi Bosta. Nientidemancu, sentza chi Bosu dhu