Is Pregadorias antigas: su signo de sa devozioni - Provincia del ...

310
IS PREGADORIAS ANTIGAS - SU SIGNU DE SA DEVOTZIONI
istupenda operatzioni elevais su pruini de sa sepultura a resplèndiri impari cun s’ànima
in sa glória de su celestiali regnu Bostu. Aici Bosu destrueis s’operatzioni de su
dimóniu, e reformendu e beatifichendu totu s’ómini, portais a cumplimentu su primu
consillu Bostu in manera ancora prus santa e prus ecellenti. O su perfetíssimu Rennovadori
chi Bosu seis e su gloriosíssimu Salvadori de s’òpera Bosta! Ma si aici perfetu
seis e aici gloriosu po totus, meda prus seis po sa ecelsa Mama Bosta Maria; e si po is
àterus óminis reservais sa perfetzioni de su rennovamentu e de sa glória a su fini de is
séculus, in Maria bolleis chi po onori Bostu e Suu e po consolatzioni de sa Crésia de
sa cali Issa est figura, si cumplat súbbitu interamenti su grandu Mistériu de sa saludi
e de sa glorificatzioni; e po cussu dha resuscitais in sa tertza dí apustis de sa morti, e
prus magnificamenti de su chi s’at a fai po is àterus in sa resurretzioni generali, dha
pigais cun Bosu in sa glória. Dèu bengu innòi plenu de reconoscéntzia e de allegria a
Bosi donai infinitas làudis e devotíssimas gràtzias, o Gesugristu, poita chi cun custu
Bosu mi feis prus vivamenti crèiri e isperai chi apustis de su Redentori ant a resuscitai
sentza duda is redímius, apustis de sa Mama is fillus. Aggradessei duncas chi dèu a
glória Bosta e a consolatzioni mia, cun su coru in sa língua, alabenduosí e ringrazienduosí
bosi fatza innòi sa confessioni de cussa fidi aici bella cun is paràulas chi s’Ispíritu
Bostu iat postu in buca a s’antigu Giobbi: Scio quod Redemptor meus vivit, et in novissimo
die de terra surrecturus sum: Bosu, Redentori miu, resuscitau po primu de sa
morti, biveis immortali in sa glória; e dèu creu po cussu chi ancoras dèu po virtudi
Bosta apu a resuscitai in su fini de is séculus, e apu a bíviri cun Bosu in eternu. Et
rursum circundabor pelle mea, et in carne mea videbo Deum meum, quem visurus sum
ego ipse et non alius, et oculi mei conspecturi sunt: apu a mòrriri dèu certamenti in
pena de su pecau, e sa carri mia at a isperimentai sa corrutzioni de sa sepultura; ma seu
certu chi dèu etotu cun custus ogus mius apu a biri a Bosu, o Deus e Salvadori miu, in
sa glória Bosta. O santa Fidi! O dulcíssima Sperantza de su Cristianu! Dèu dha tengu
gelosamenti custoia in su coru miu: reposita est haec Spes mea in sinu meo (Job. 19.).
Unu Babbunostu, tres Ave Marias, unu Gloria Patri.
Oratzioni a sa Vírgini Maria
Santíssima Vírgini Maria! Bosu seis veramenti beata, poita chi ecu chi est istau maravigliosamenti
compliu su chi su Segnori iat pronuntziau de Bosu fintzas de su printzípiu
de su mundu, narendu chi Bosu iais a èssiri istada valorosa inimiga de su
dimóniu, e chi dhi iais a scerfai sa conca. Bosu infati eis bintu in Bosu etotu de
dógnia parti su pecau; e su dimóniu non at pótziu mai acostaisí a Bosi manciai nemancu
cun ligeríssimu neu de culpa su puríssimu candori. Bosu cun su frutu beneditu
de su sinu Bostu eis bintu totus is poténtzias de s’inferru, e numerosas fillas de Fidelis
avaloraus de Bosu apetigant is diabbólicas insídias e triunfant de sa malítzia infernali.
Ma in su èssiri Bosu assunta gloriosamenti cun s’Ànima e cun su Corpus a is
Celus, binceis de dógnia parti ancora sa morti, chi po distrúiri su géneru umanu s’infernali
serpenti iat introdúsiu in su mundu. E ecu chi strapendu Bosu totu a s’impériu
de sa morti cun sa virtudi de Fillu Bostu Gesús, e non lassendu a Issa mancu unu pilu
de sa Conca Bosta, intrais triunfadora gloriosa in su Regnu de s’eterna vida, e sa via
aberta già de Gesugristu mostrais a totu sa Crésia po nc’intrai felitzementi avatu