Is Pregadorias antigas: su signo de sa devozioni - Provincia del ...

Comune di Samassi
Atu de contritzioni
Umiliaus in su nienti nostu confessaus a Bosu, o Deus Babbu Onnipotenti, e a Bosu,
o Maria Santíssima Mama nosta, chi seus indigníssimas creaturas reas de medas
pecaus de pensamentus de paràulas e de òperas. Nos indi penteus e vivamenti nos
ind’afligeus, poita chi pechendu eus pérdiu su Celu, e eus meritau s’inferru; e prus de
totu poita chi eus oféndiu a Bosu, o Deus amabbilíssimu, e a Bosu, o Mama nosta
piedosíssima. Conosceus chi seus débbilis e inclinaus a su malu. Ma confiendu in
s’agiudu Bostu celestiali, promiteus firmamenti de mai prus pecai. Cun coru sintzeramenti
contritu imploraus e isperaus misericórdia e perdonu. E bollendu innòi considerai
devotamenti su gloriosu privilégiu de s’Immaculada Concetzioni Bosta, o
Maria, ndi domandaus sa gràtzia a Bosu, o Segnori, chi dh’eis operau, e a Bosu, o
Vírgini benedita, chi ndi seis istada fata digna.
(Aici si cumentzat dogna dí)
Prima dí
Fatu singulari e gloriosíssimu, mai bistu in is misteriosus cuaranta séculus chi dh’ant
pretzédiu, e chi mai s’at a renovai in is séculus posterioris, est sa Concetzioni Immaculada
de Maria; sa cuali meda cara po sèi etotu a su coru de su Cristianu, est ancora
meda prus cara poita chi est intimamenti unia a is grandus Mistérius chi a dógnia
ómini sunti de supremu interessu temporali e eternu. Issa nosi monstrat innantis de
totu sa natura umana restituia a sa prima integridadi sua in Maria. Creada custa natura
pura e innotzenti, ogetu de is cumplaxéntzias divinas, fiat istétia súbbitu apustis
infetada de su velenu de su pecau, e gemiat arruta in disgràtzia de su Creadori suu e
incapatzi a si rinconciliai cun Issu. Corrúmpias totus is vias suas, e sa via po sa cali is
óminis intrant a sa vida, e sa via de su bíviri, e sa via de su mòrriri insoru, issa non
podiat agatai comenti bessiri de su miserabbilíssimu stadu suu. Ma Deus Creadori
biendu aici guastada s’òpera Sua, bèni allargu de acabbai de dha fracassai e de dha
pèrdiri, at bófiu comenti Artífitzi piedosíssimu e ótimu, reformaidha e faidha un’àtera
borta pura e innotzenti comenti fiat in Adamu e in Eva in su printzípiu. Ponit manu
duncas a si formai una creatura chi introdusat unu gradu nou de puresa e de innocéntzia
originali in mesu de is brutesas de sa naturalesa corrúmpia. E ecu chi cumparit
Maria totu bella e sentza mància fintzas de su primu istanti de su èssiri Suu, sentza
tènebras de ignoràntzia, sentza inclinatzioni a su pecau, sentza debbilesas in s’ànima,
sentza rebbellioni contra su spíritu in su corpus, única Immaculada inter totus is fillus
de is óminis, chi cun su puríssimu candori Suu cumpensat a is ogus de Deus sa schivosa
corrutzioni de totus is àterus, e in sa perfeta integridadi Sua rapresentat esprímia
nobbilissimamenti sa prima integridadi de sa natura umana, cali fiat essia de is manus
puríssimas de Deus Creadori. Est beru chi custa natura malàida, bennia sa plenitúdini
de is tempus, depiat arreciri dógnia integridadi e perfetzioni in Gesugristu; ma Gesugristu
fiat a su própriu tempus Deus e Ómini; e si bolliat chi ancora intre is puras
creaturas nci fessit unu flori immaculadu, in su cali cumpargessit perfetamenti restabbilia
s’òpera de Deus. Imoi su flori eletu chi cumplit custu Mistériu est apuntu Maria.
Unu Babbu nostu, tres Ave Marias, unu Gloria Patri.
231