Is Pregadorias antigas: su signo de sa devozioni - Provincia del ...

284
IS PREGADORIAS ANTIGAS - SU SIGNU DE SA DEVOTZIONI
Órdinis Religiosus, ornamentu e glória, e fortalesa e triunfu de sa Crésia de Gesugristu
Fillu bostu; in is cualis innumeràbbilis personas de dógnia conditzioni e sessu s’ant a
separai de su mundu comenti feis Bosu, o Maria, e s’ant a ofèrriri e consagrai in perpétuu
in su Templu de su Segnori, renuntziendu po amori Suu cun solennis votus a is
bènis de sa Terra, a is plaxeris e commodidadis de sa vida, a sa própria libbertadi e
voluntadi, po èssiri totu de Deus a imitatzioni Bosta. Custa oferta Bosta duncas est tali
segretu sacrifítziu, ch’intrat in alta iportantíssima manera in is grandus disignus de
Deus po sa saludi de su mundu, po sa santificatzioni de is fidelis, po sa glória de sa
Crésia. O cantu seis ammiràbbili fintzas de Pipiedha, o Maria! Ah! siais in particulari
po mei tali esemplari e tali Maista, chi mi alleteis potentementi cun sa suavi fragràntzia
de is virtudis Bostas a camminai in is vias Bostas fintzas a sa morti.
Unu Babbunostu, tres Ave Marias, unu Gloria Patri.
Nona e última dí
Cun ispíritu de sa prus ecellenti devotzioni e de su prus sintzeru sacrifítziu intrat sa
Virginedha Maria in su Templu, e si oferit e si consagrat inní a su Segnori. Totu inní est
po Issa venerandu e santu, e totu de Deus dhi fuedhat, su Tabbernàculu, s’Altari, su
fogu sagrau, s’incensu, is misteriosus bestiris, is vítimas, is Satzerdotus. Basat Issa po
reveréntzia su logu santu in su cali cumentzat a pònniri is virginalis peis Suus, adorat sa
Divina Magestadi chi abbitat inní in modu particulari e, comenti Issa etotu at revelau,
istabbilit in su coru Suu de non tènniri àteru Babbu che a Deus, de non fai àtera cosa che
amai a Deus, de àteru non circai che sa manera de plàxiri sèmpiri mellus a Deus. Pregat,
trabballat, ligit e méditat is Divinas Iscrituras, ubbidit a is magioris, e prus de totu a is
Satzerdotus. Reguladas, impleadas seriamenti totus is oras Suas, non perdit inutilmenti
unu momentu de sa dí; e in mesu de su siléntziu de sa noti si pesat po adorai a s’altari de
su Segnori de is ventanas chi donant a su Templu, e po pregai ispandendu totu su coru
Suu, printzipalmenti po sa bennida de su Messias; e ancora candu reposat e dormit, sa
menti Sua est in is cosas santas e su coru Suu vígilat a Deus. A biri sa gràtzia de is
maneras e de is paràulas Suas, sa mansuetúdini, sa esata puntualidadi prus che Angélica,
s’ubbidiéntzia, sa temperàntzia in su papai, s’abbilidadi in trabballus cumbenientis
a sa conditzioni Sua, totus abbarrant incantaus, e si reputant afortunaus de posseiri
custu celestiali tesoru. Tali est Maria in su Templu, esemplari ammiràbbili de is domésticas
virtudis chi dógnia fillu e dógnia filla Cristiana depit praticai.
Unu Babbunostu, tres Ave Marias, unu Gloria Patri.
Oratzioni a su Babbu Eternu
Santíssimu Eternu Babbu! Bosu feis intrai in su Templu Bostu sa Virginedha Maria, e
nci dha teneis ocultada po su spàtziu, comenti si creit, de úndixi annus, in sa própria
manera chi eis a tènniri ocultau po medas annus in sa pòbera domu de Nàzaret s’Unigénitu
Fillu Bostu Gesús. E comenti Gesús in cussu maravigliosu ocultamentu, istendu
sugetu a sa Mamma e a su Babbu Suu putativu, at a andai crescendu impari cun s’edadi
in sapiéntzia e in gràtzia a is ogus de Deus e de is Óminis, in cantu chi at a manifestai
sèmpiri prus is tesorus de sa Divinidadi Sua; aici imoi feis crèsciri maravigliosamenti a
Maria impari cun is annus in dógnia sorti de gràtzias e de virtudis. Bosu, o Babbu