Is Pregadorias antigas: su signo de sa devozioni - Provincia del ...

Comune di Collinas
Gògius de sa natividadi
de sa Vírgini Maria 49
(Sa festa si cèlebrat in Collinas
sa dí 7, 8, 9 de setembri
in sa Crésia sua)
In sa noti prus oscura
de sa culpa originali
nascis Tui, Maria pura,
po rimediai su mali.
1) Nascis Tui, divina Aurora
e allirgas totu su mundu
nascis Regina e Signora
de su celu, terra e profundu,
o momentu prus giocundu
po sa terra universali.
Nascis Tui…
2) De Israeli ses decoru,
de su mundu s’ornamentu,
ses de is Àngelus tesoru,
de su celu ses cuntentu:
o miràbbili portentu!
Regina celestiali.
Nascis Tui…
3) De su soli prus splendenti,
de sa luna su candori
a Tui súbbitu sa genti
donat glória e grandu onori;
a Tui pregat cun fervori
in sa terra ogna mortali.
Nascis Tui…
4) In gioja Eva su prantu
torras, Vírgini Maria,
a nos su divinu mantu
istendis Tui clementi e pia;
ses sa dulci cumpangia,
ses sa mamma universali.
Nascis Tui…
5) O divina tesorera
de is gràtzias de Deus;
o potenti dispensera
po chini totu oteneus:
Cantu amori Ti depeus
e carignu filiali.
Nascis Tui…
6) Ses consolu a su cristianu
ses s’istella matutina
in su monti e in su planu
T’invocaus, o gran Regina,
de ogna gràtzia divina
O inefàbbili canali!
Nascis Tui…
7) Arca noba verdadera
donaisí paxi segura,
flori de sa primavera
e sublimi creatura.
Cun Tui s’ànima est segura
de su nimigu infernali.
Nascis Tui…
8) Una crésia, circundada
de unu boschetu silentziosu,
is antigus dedicada
T’iant cun votu fervorosu:
Tui cun su coru amorosu
Si protegis de ogna mali.
Nascis Tui…
9) Cun fervori T’invocaus,
o Maria Immaculada;
in Tui totus cunfidaus
ca ses nostra abbogada.
Sempri prus siast invocada
cun afetu filiali.
Nascis Tui…
59