Is Pregadorias antigas: su signo de sa devozioni - Provincia del ...

Comune di San Gavino (Santuéngiu)
Aturat dognunu prontu a su cumandu
chi donat Pascàsiu infami e brutali;
súbbitu esighendu s’órdini esacrandu,
pigant a Luxia cun furia infernali.
De su tribbunali a sa domu impura,
o Columba pura, isposa de Gesús,
is tirannus tuus t’istant ispingendu,
meschinus credendu de depi triunfai.
De depi triunfai s’ora est arribbada
po tei Isposa eleta de Deus Soberanu;
totu cussa genti ímpia e scelerada
a sa domu infami t’ispingit invanu:
sa divina manu firma ti sustenit;
poderi non tenit de ti movi prus
de is dexi giús sa fortza potenti
chi su presidenti fait atacai.
Chi fait atacai tanti fortza invanu
osservat Pascàsiu cun menti turbada;
ma un’altru cumandu donat inumanu
chi bengas de linna prestu ingiriada
po chi abbruxada de unu grandu fogu
bengas in su logu aundi firma aturas;
ma non t’ispauras a custa notítzia,
antzis sa letítzia si bit aumentai.
Aumentant is flammas in d-unu momentu
e in mesu de issas ses tui, o Luxia.
S’ímpiu Pascàsiu in coru est cuntentu
e dogna paganu tenit allegria;
però aturdia si bit cussa genti,
candu dultzementi cantai t’intendit,
poita cumprendit chi sana in is flammas
su Deus chi amas ti bolit cunservai.
Ti cunservat sana, e mancu su bistiri
de su fogu ardenti est beniu tocau;
serena e cuntenta ti bint bessiri
pustis chi su fogu fiat consumau;
cunfúndiu e burlau Pascàsiu si bit;
meschinu no iscít in cussu momentu
un’altru turmentu prus duru e prus forti
aundi sa morti potzas incontrai.
Finas a incontrai àteru turmentu
in d-unu presoni benis inserrada;
inní puru aturas cun summu cuntentu,
sufrendu po Deus totu rassignada,
s’ora fortunada aspetendu ansiosa
de bolai diciosa […] a su celu
aundi sentza velu po un’eternidadi
s’Alta Trinidadi depis cuntemplai.
De depi gosai sèmpiri in sa Glória
ecu finalmenti s’ora est arribbada:
isperendi Pascàsiu de tenni vitória
asuba de tei Vírgini Sagrada
armau de ispada mandat unu paganu;
cun colpu inumanu benis degollada;
s’ànima beada a sa Pàtria diciosa
bella e vitoriosa bolat a gosai.
Bolas a gosai pustis ch’is tirannus
cun vera costàntzia as umiliau;
in s’edadi bella de circa bint’annus
sa palma de màrtiri as concuistau;
e ti as meritau de su mundu interu
onori sinceru e veneratzioni.
In s’aflitzioni a tui si racomandat
e sa tumba bandat po ti venerai.
353
Andat a sa tumba sa genti meschina
aundi rimédiu isperat prontamenti.
Sanas tui is tzurpus sentza de mexina
poita chi Deus ti at fatu potenti;
curas prontamenti su mali prus mannu:
rimédias su dannu de dogna divotu,
a su mundu totu cuntzedis favoris:
giustus, pecadoris solis consolai.
Giustus, pecadoris, totu premurosa
mira de sa Glória, ínclita Luxia:
viagendu in custa terra tenebrosa
de tei dogn’ànima bengat assistia;
e candu finia at a èssi custa gherra,
Tui de sa terra portasí a su celu;
santa totu zelu, mostradí potenti
po chi eternamenti potzaus gosai.