Is Pregadorias antigas: su signo de sa devozioni - Provincia del ...

Comune di San Gavino (Santuéngiu)
Giusepi beau,
su Vírgini Isposu
carítziat diciosu
su Verbu umanau
dh’adorat prostrau
sa menti sua pia.
Dormi...
In plantu penanti
o in durtzi sorrisu,
de su Paradisu
visioni ismaglianti,
pretziosu diamanti,
perenni decoru.
Riposa...
Úmilis giumentus
su téneru Infanti,
tra is fàscias penanti,
cun suavis acentus,
tra is durtzis lamentus,
dhi usant cortesia.
Dormi...
Su vivu isplendori
de luxi fiammanti
annúntziat s’amanti
Gesús Redentori,
chi est nàsciu Signori
d’eterna allegria.
Dormi...
De celu ambasciada
a is pius pastoris,
tra cantus e onoris:
s’annúntziu narada,
chi a terra abbasciada
eternu Tesoru.
Riposa...
Sa boxi gloriosa
de angélicu cantu:
siat glória a Deus Santu,
siat làudi copiosa,
intonat festosa
cun suavi armonia.
Dormi...
E a s’ómini ancora
de coru sintzillu
siat paxi e consillu
in custa dimora,
alternat sonora
durtzi melodia.
Dormi...
Is milli Innocentis,
puríssimus floris,
is primus onoris
ti donant gementis,
prim’óstia ferventis
su sànguni intzoru.
Riposa...
Tra is fàscias penanti
ti biu circuncisu,
de sànguni intrisu;
su nòmini amanti
de Gesús intanti
postu ti beniat.
Dormi...
A is reis de Orienti
su vivu bagliori,
su raru candori
de istella isplendenti
de luxi fulgenti
dimostrat sa bia.
Dormi...
De is regnus lontanus,
cun pompa regali,
de fidi in signali,
is donus arcanus
dh’ofrescint in manus,
mirra, incensu e òru.
Riposa...
329