Is Pregadorias antigas: su signo de sa devozioni - Provincia del ...

Comune di Villacidro (Bidhaxidru)
Oratzioni a Maria Immaculada
Puríssima Vírgini Maria! Cantu mai pretziosa no est sa forti [sorti?] Bosta! In su
primu istanti de s’ammiràbbili cuncetzioni Bosta arriceis Bosu cun su primu respiru
de sa vida s’aplicatzioni de is méritus infinitus de su Redentori, chi giai preservau
bos at de sa culpa. In tali manera cumplit, in d-unu modu su prus etzellenti, su prus
perfetu, e in d-unu solu puntu, sa glória de sa Redentzioni de Gesugristu, si cumplit
cun privilégiu a Bosu sola cuntzédiu, su cali bosi ponit in d-unu gradu meda superiori
a is àteras creaturas issas puru riscatadas. Deh! Custa glória Bosta, non fatzat no chi
Bosu bosi iscaresceis de nosàterus infelitzis. Seus est beru fortunaus poita tzerriaus a
partetzipai de sa Redentzioni de Gesús; pretziosa Redentzioni! Gherraus dí e noti in
mesu a is malas inclinatzionis nostras, a is pecaus, e arribbendu s’ora de sa morti
nostra, seus ancora intzertus de sa salvatzioni eterna. Non si chesciaus no de sa forti
[sorti?] nostra, poita mellus non dh’eus meréscia: ma deh! oberei Bosu, o piedosa
Maria, oberei cun is beneditas manus bostas su tesoru de sa Redentzioni de Gesugristu,
e asubra de s’estrema debbilesa nostra, dispensai is agiudus prus eficatzis, cun is
calis cumbatendu intrépidus finas a sa morti otengaus su perfetu riscatu nostru, e
s’eterna libberatzioni nostra.
Un pater, tre Ave, un Gloria.
Tertza dí
Maria cun disignu totu nou creada in sa perfeta integridadi de sa naturalesa, e cun
sa Redentzioni sa prus etzellenti riscatada po non contrairi umbra nisciuna de pecau,
non depiat aturai nemmancu unu momentu sentza èssiri plena de gràtzia santificanti.
S’Ispíritu de su Signori, chi oféndiu de su pecau de s’ómini, ritirau si fiat de
s’umana naturalesa giai corrúmpia, circada a modu nostru de intèndiri un’abbitatzioni
intre is óminis, mentras sendu Ispíritu de bondadi, e de amori bolit continuamenti
communicaisí a is creaturas suas, e rendiridhas felitzis. Ma po su spàtziu de
cuatru milla annus incontrau no iat in mesu a is óminis logu dignu de issu; e mancai
sa virtudi risplendessit in is Patriarcas, profetas, e algunus àterus giustus, nienti de
mancu in totu su tempus de s’antigu testamentu in modu tropu iscarsu si commúnicat
a is óminis. Arribbau però su tempus de Maria s’Ispíritu Santu finas de su primu
instanti de Issa Immaculada impossessau si fiat, e luxi subrannaturali sa prus clara,
e isperàntzia in Deus sa prus firma, e dultzíssimu, vivíssimu amori po issa, e dogna
sorti de donus, e gràtzias tzelestialis casi sentza misura in cussu primu instanti
depositau iat in su sinu de Maria.
Cantzau po narri aici, de circai inutilmenti in mesu a is óminis, finas de cussu momentu
fissau iat in Maria, s’abbitatzioni sua, e Maria finas de intzandus arreciu iat sa
prima plenitúdini de sa gràtzia, po sa cali fata est istétia prus ecelsa, e prus santa de
totus is àteras creaturas, prus sublimi de totus is Serafinus tzelestis, de modu, chi issa
finas de cussu primu istanti pótziu at nai cun rexoni de sèi etotu: “Sa gràtzia santificanti,
s’Ispíritu Santificadori, de su Deus miu, benniu est a si riposai in su coru miu”
requievit in tabernaculo meo.
Un pater, tre Ave, un Gloria.
553