Is Pregadorias antigas: su signo de sa devozioni - Provincia del ...

234
IS PREGADORIAS ANTIGAS - SU SIGNU DE SA DEVOTZIONI
Oratzioni a Deus Redentori
O potentíssimu Redentori de is Óminis! Chini mai at a ai pótziu dudai chi sa Redentzioni
operada de Bosu non siat istada tantu abbundanti e perfeta, chi non solamenti
apat libberau su comuni de is Óminis de is màncias de pecau già cuntraias, ma apat
libberau ancora calincun’ànima privilegiada de no ndi contrairi mai alguna? Antzis
chini mai nci at a èssiri istau chi no Bosi apat donau custa glória tantu bèni de Bosu
meritada, e a Bosu dépia tantu giustamenti? Si, Divinu Redentori! Fiat dépia a sa
subrabbundàntzia de is méritus Bostus; fiat dépia a sa illimitada virtudi Bosta, chi
totus is tempus abbratzat ancora is passaus e is venturus; fiat dépia a sa infinita santidadi
Bosta chi ódiat estremamenti dógnia pecau e fintzas s’umbra de su pecau; fiat
dépia certamenti sa glória de ai bintu sa morti de su pecau innantis ancora chi fussit
intrada in d-un’ànima; sa glória non solamenti de sollevai su chi fiat arrutu, ma de
mantènniri ancora e preservai calincunu po no arrúiri mai. Nosàterus confessaus cun
allegria chi a Bosu apartenit veramenti custa glória, o Gesugristu, e cun trasportu de
afetus Bosi dha donaus. A Bosu dógnia onori e dógnia glória in eternu! Custa est
glória de Redentori perfetíssimu onnipotentíssimu comenti seis Bosu; custa est glória
de una Redentzioni sa prus etzellenti, sa prus abbundanti, sa prus nóbbili, sa prus
digna de Bosu. Ma custa est Redentzioni chi Bosu, a calincuna creatura solamenti
privilegiada in summu gradu eis in is sapientíssimus consillus Bostus reservada. Ma
chini podit èssiri mai cust’afortunada creatura foras chi Maria?
Unu Babbu nostu, tres Ave Marias, unu Gloria Patri.
Oratzioni a Maria Immaculada
Puríssima Vírgini Maria! Cantu no est mai pretziosa sa sorti Bosta! In su primu
instanti de sa Concetzioni Bosta Bosu arriceis impari cun su primu àlidu de vida
s’aplicatzioni de is subrabbundantis méritus de su Redentori chi Osi preservat de
contrairi neu ne umbra de pecau, e bieis cumplia in Bosu in cussu primu instanti sa
glória de sa Redentzioni de Gesugristu in manera sa prus etzellenti e perfeta, cun
singularíssimu privilégiu a Bosu sola concédiu, chi Bosi ponit in d-unu gradu meda
superiori a su de totus is àteras creaturas rescatadas. Ma o cantu prus seis afortunada,
o Maria, poita chi seis rescatada in manera tantu nóbbili e perfeta po donai a su
Redentori su Corpus e su Sànguni cun su cali Issu depit rescatai totus is àterus
Óminis! Aici est veramenti. De sa virginali puríssima carri Bosta depeis donai sa
Carri chi, deificada de su Verbu Eternu Redentori, at a formai sa vítima chi s’at a
immolai po satisfai a sa Divina Giustítzia e po rescatai su mundu; de su puríssimu
Sànguini Bostu divinizau in Issu s’at a formai su Sànguini espiadori de is pecaus
chi s’at a ispàrgiri po purificai su géneru umanu; sa Carri chi at a èssiri pani vivu e
vitali po sustentai is ànimas, su Sànguini chi at a èssiri bevida delitziosa de celestiali
puresa e de vida eterna a totus is fielis; su Sànguini e sa Carri chi at a populai
de Vírginis e de Santus sa Terra e su Celu, e chi bestia de glória at a èssiri elevada
asuba de totus is Celus, e collocada in su sóliu de sa Divinidadi a sa dereta de Deus.
O cali etzelsa puresa e santitadi est sa Bosta, o Maria! O cali abbissu de glória! Ma
sa glória Bosta no Bosi fatzat iscarèsciri de nosàterus miseràbbilis, chi ancoraschí