Is Pregadorias antigas: su signo de sa devozioni - Provincia del ...

Comune di Samassi
celestiali, dhi avalorais s’ispíritu po chi potzat cumprèndiri su grandu inesplicàbbili
disignu de su Rescatu de su mundu po mesu de su Verbu Incarnau. Bosu dhi dilatais su
coru po chi potzat abbratzai s’eternu Divinu Amori fatu Isposu Suu, e istringirisí a su
sinu cun immensu afetu totus is óminis, chi dh’eis a donai po Fillus. Bosu dhi poneis in
sa menti una luxi superiori po cuntemplai sèmpiri prus claramenti su Divinu Verbu
Bostu, e is mistérius de Issu, e po dhu contzebiri ispiritualmenti, e si dispònniri aici a
dhu contzebiri una dí corporalmenti. Bosu dhi confortais totus is poténtzias po pòdiri
portai sentza ndi abbarrai oprimia, sa glória de sa Divinidadi, e su pesu de is mistérius
de sa prus sublimi caridadi e de sa prus profunda umilidadi. Ma chini at a pòdiri isplicai
totus is maravigliosas operatzionis chi Bosu andais cumplendu in custa Filla Bosta
predileta duranti su tempus de s’ocultamentu Suu in su Templu? Bastat nai chi donais
innòi s’última manu po dha fai digna Mamma de su Divinu Fillu Bostu e digna cumpàngia
de is Mistérius de Issu po sa glória Bosta e po su rescatu e salvatzioni nosta.
Gràtzias a Bosu, o Babbu celestiali! Siais alabau e glorificau in eternu!
Unu Babbunostu, tres Ave Marias, unu Gloria Patri.
Oratzioni a Maria Santíssima
Santíssima Vírgini Maria! Dèu intru in ispíritu cun Bosu in su Templu, e cuntemplu
cun devotzioni sa santa cuntentesa de sa bell’Ànima Bosta, e is venerandas operatzionis
chi s’Ispíritu de su Babbu celestiali bandat cumplendu in Bosu. Seis coment’e
in d-unu Paradisu, in sa domu de Deus chi fait is delítzias Bostas. Epuru seis Bosu chi
formais su Paradisu de custu Templu, e Deus si cumplaxit meda prus in Bosu, che in
totus is richesas de su Templu e in totus is sacrifítzius chi si nci oferint continuamenti.
Ah! Vírgini amorosíssima! S’esemplu Bostu nos imparit a tènniri su prus grandu
afetu a su sagrau Templu, a sa santa domu de Deus; nos imparit a onorai su Templu de
Deus cun sa santidadi nosta, poita chi nosàterus etotu depeus èssiri Templus biventis,
in is calis Deus bollit abbitai e delitziaisí mellus che in is Templus materialis. E
comenti is Crésias visíbbilis de custa Terra sunt immàginis de su Templu invisíbbili
de su Celu aundi Deus fait sa prus istupenda manifestatzioni de is tesorus de sa beatitúdini
e de sa glória Sua; aici s’esemplu Bostu nos imparit a disigiai ardentementi
cussu Templu celestiali chi depit èssiri s’eterna domu nosta, e a nosi fai dignus de
issu. E po cussu o Maria, renovai in totus nosàterus su mistériu e is gràtzias de sa
presentatzioni Bosta a su Templu de Gerusalemmi: presentai e fei atzetus a Deus is
pipius nostus e agiudai is Babbus e is Mamas a dhus ofèrriri e cunsagrai a su Segnori
de candu dhus gènerant e dhus donant a luxi, e meda prus candu dhus presentant in sa
Crésia a is miraculosas àcuas batisimalis. Presentai e fei atzetus a Deus is piticus chi
cumentzant a tènniri s’usu de sa raxoni, e agiudaidhus a renovai insaras is promissas
solennis de su Batísimu insoru, e a si cunsagrai a s’amori e a su servítziu de Deus po
sèmpiri. Presentai e fei atzetus a Deus is chi acabbant sa vida temporali, e candu est
dissólvia cun sa morti custa domu terrena chi est su corpus nostu introduseinosí cun
is virginalis manus Bostas in su Templu de sa eterna benaventurantza. E aici feinosí
gosai is pretziosus frutus de is mistérius Bostus e de su Divinu Fillu Bostu Gesús in
custa e in s’àtera vida, o piedosa, o clementi, o dultzíssima Vírgini Maria. Aici siat.
Unu Babbunostu, tres Ave Marias, unu Gloria Patri.
285