Is Pregadorias antigas: su signo de sa devozioni - Provincia del ...

558
IS PREGADORIAS ANTIGAS - SU SIGNU DE SA DEVOTZIONI
Salve o Mamma sa prus aventurada, Beneditu est su frutu de is intragnas Bostas Gesús,
e po issu creada seis Bosu in is beneditzionis. Arregordaisí duncas o Maria, chi po
salvai a nosàterus seis istétia Bosu elígia Mamma de su Divinu Salvadori, e chi sendu
bosu Mamma de custu corpus Divinu, seis istétia fata ancoras Mamma de is membrus.
Nosàterus totus membrus mancai indignus de custu corpus adoràbbili nos assugetaus
a Bosu in calidadi de Mamma de Deus, e de Mamma nostra, e a Bosu interamenti
nosi donaus in onori de cudha donatzioni, chi su Verbu Eternu bos at fatu de sèi etotu
in calidadi de Fillu. O Mamma! O Mamma! O piedosa Mamma nostra! Est dultzi a
fillus tanti míserus comenti seus nosàterus su repítiri in custu esíliu unu nòmini tantu
caru. Deh! Mostrai sèmpiri prus sa materna teneresa Bosta asubra de nosàterus: o
ascritus comenti seus intre is fillus Bostus in custa valle de làgrimas, fadeinosí ascriri
intre is eletus de Fillu Bostu in su Celu.
Un Pater, tre Ave, un Gloria.
Sesta dí
Destinada Maria finas de s’Eternidadi a Mamma de su Fillu de Deus depiat èssiri
ancoras finas de s’eternidadi destinada a isposa de s’Ispíritu Santu. Poita aici comenti
non po àteru decretau fiat istétiu in su Divinu consillu su mistériu de sa Divina
Maternidadi de Maria si non po cumpliri su prus grandu atu de amori de Deus po is
óminis, e aici comenti is òperas de bondadi, e de amori sunt próprias de s’Ispíritu
Santu, chi est s’amori de su Babbu, e de su Fillu, fessit ancoras Isposa de s’Ispíritu
Santu ancoras cumbeniat. Benei duncas santus, e sublimis pensamentus, chi de su
Celu solamenti abbasciais, benei a nos ispiegai s’incomparàbbili mistériu de custu
isposalítziu tzelestiali. Ah s’Ispíritu Santu si fait isposu de Maria! Ma no est no
cust’isposalítziu coment’e su chi si cumplit intre is ànimas giustas e s’Ispíritu Santu;
est beru custu totu puru, e tanti, ma nienti tenit de biri cun sa dignidadi soberana de
s’isposalítziu de s’Ispíritu Santu cun Maria. Cudhu tenit po ogetu su ndi pigai da is
eletus s’infàmia de su pecau, custu tenit po ogetu su prodúsiri su Santu de is santus;
cudhu est un’isposalítziu de misericórdia, cun su cali s’Ispíritu Santu càmbiat in is
eletus s’ódiu in amori: custu est un’isposalítziu de eterna cumplaxéntzia non mai
turbada de inetitúdini, de ódiu, e de timori. Cudhu insumma non fait che rèndiri is
ànimas eletas casi amigas e fielis serbidoras, chi a su cortégiu serbint de s’isposu, ma
cust’isposalítziu fait a Maria fémmina perfeta, única culumba, soberana Signora de
totus is àteras isposas, chi sunti sentza númeru. Ita duncas est s’isposalítziu de s’Ispíritu
Santu cun Maria? Ah, est unu mistériu altíssimu e santíssimu. Mancant is paràulas a
ndi narri de prus: is prus sublimis pensamentus innòi si firmant, e àteru non aturat,
che adorai cun siléntziu profundu unu mistériu tantu mannu.
Un Pater, tre Ave, un Gloria.
Oratzioni a s’Ispíritu Santu
Eternu divinu Ispíritu! Chini cumprèndiri mai podit is communicatzionis inefàbbilis
chi passant tra Bosu, e sa predileta Isposa Bosta Maria? Si s’òpera de un’isposalítziu
tali est tantu sublimi, chini ispiegai at a pòdiri, cun cali misteriosa impaziéntzia eis