san carlo 2 bassa bresciana.qxd - Brixia Sacra

BRIXIA SACRA
[b.] [f. 180r] In ecclesia parochiali archipresbiterali nuncupata
Sanctorum Nazarii et Celsi loci Castillioni
Tabernaculum ligneum Sanctissimae Eucharistiae fiat decentius, magisque
amplum pro dignitate et amplitudine loci, et ratione ecclesiae ad formam in
instructionibus praescriptam; idque infra biennium, impensis societatis
Corporis Christi. Contegatur conopeo decentiori, quod mutari debet pro
ratione colorum, quibus ecclesia utitur, eiusdem scholae impensis. Tegmen
fiat decens, vel e tela saltem ornate picta, quo altare et sacerdos celebrans
contegantur ad formam instructionum. Duae pixides fiant, altera magna
pro populi communione, altera vero minor, sed decens ad usum deferendi
sanctissimum sacramentum eucharestiae ad infirmos, et haec quae nunc
adest, ad formam reducatur. Sacrarium, quod est iuxta baptisterium sera et
clave muniatur. Sacrarium, quod est in plano chori, obstruatur, et aliud in
muro, vel in sacristia exaedificetur. Antiqua custodia Sanctissimi Sacramenti,
quae adhaeret parieti sacristiae, signo literisque deletis, locetur in choro
apud altare maius a latere evangelii ad usum olei infirmorum.
Construantur a parte septentrionali tres capellae cum fenestris clathris
ferreis munitis, quae capellae muro distinguantur ad formam instructionum.
Altare Sancti Ioseph, quod est orientem versus, construatur in fronte
capellae septentrionem versus. Capellania, quae est ad praedictum altare,
cum liquido ex informationibus sumptis non constat habere curam
annexam consensu reverendissimi ordinarii, nec non archipresbiteri praetensi
[f. 180v] patroni, denuo in coadiutorialem erigatur, qui missas celebret
et archipresbiterum coadiuvet in administratione sacramentorum, quemadmodum
alii coadiutores. Fructus dictae capellaniae duorum annorum
expendantur ad usum fabricae dictarum capellarum. Altare Sanctae Luciae
tollatur, et oneri satisfiat ad altare maius. Archipresbiter pro tempore curet
ut omnes fructus provenientes ex bonis relictis a familia de Lolatiis expendantur
ex voluntate testatoris. Altare Sancti Iohannis Baptistae, quod est
subter organum, tollatur infra mensem, nec deinceps ibi celebretur.
Organum alibi locetur iuditio ordinarii, et ibi construantur duae capellae,
interiecto muro inter unam et alteram, quae respondeant aliis cappellis
e regione septentrionem versus constructis. Tollatur penitus altare Sancti
Antonii, quod pilae seu arcui inhaeret, et construatur in fronte capellae, ita
ut meridiem versus vergat; intereaque cappellanus curatus satisfaciat oneri
204