san carlo 2 bassa bresciana.qxd - Brixia Sacra

BASSA ORIENTALE
[b.] [f. 214v] In ecclesia parochiali Sancti Andreae archipresbiterali
nuncupata, et collegiata insigni terrae Asulae
Tabernaculum ligneum inauratum extruatur, idque decentius atque
amplius ad formam instructionibus generalibus praescriptam, ut ecclesiae
oppidique rationi respondeat. Aliae binae pixides comparentur infra sex
menses, quarum altera in populi communione est adhibenda, altera in sanctissima
eucharistia ad aegros ferenda. Reliquia sancti Iohannis Chrysostomi
in tabernaculo gestatorio decenti cum vitro inclusa in eadem fenestella,
in qua nunc est, asservetur, quae tamen ad decentiorem formam reducatur,
intrinsecusque asseribus et panno serico circumvestiatur.
In loco ubi nunc est altare Corporis Christi, sublato altari, construatur
a communitate capella, quae foris extra parietem ecclesiae extet atque promineat
tribus vel quatuor cubitis, eoque etiam amplius si fieri poterit pro
ratione publicae viae, in eamque tranferatur baptisterium ad formam constructum,
et cum sacrario, clathraque ferrea claudatur. Vascula oleorum ad
praescriptum instructionum conflata comparentur, asserventurque in
ciborio baptisterii, aliud vero vasculum olei pro aegrotis ab aliis seiunctum
asservetur in fenestella inferiori capellae maioris a latere evangelii, quae
ornetur ad formam. Sacrarium aliud ad praescriptum instructionum construatur
in capella maiori ad usum abluendi corporalia.
Altare maius intra menses duos aliquantulum versus populi stationem
transferatur, ita [f. 215r] ut tabernaculum Sanctissimi Sacramenti, quod
super altare erit, recte sub arcu proximo positum sit. Super altare maius
appendatur umbella decens, quae ipsum et sacerdos celebrans contegantur.
Capella dealbetur, et suis locis pictura ornetur infra biennium. Bradella aliquantulum
restringatur. Chorus ligneus post altare construatur. Fenestrae
duae fiant in choro in duobus spatiis post altare, obturata fenestra veteri, et
aperiatur oculus. Hycona ad murum transferatur, ita ut muro, quantum
fieri potest, inhaereat et propterea, si opus erit, restringatur, vel potius alia
decentior adhibeatur. Pavimentum capellae aliquantulum altius extollatur,
ita ut in ingressu capellae fiant tres gradus infra menses duos. Capella
maior clathris ferreis infra menses sex muniatur super gradu superiori.
Omnis reparatio et ornatus suprascripti altaris et capellae maioris praestetur
sumptu archipresbiteralis praebendae, excepto sumptu qui fiet a schola
Corporis Christi.
331