san carlo 2 bassa bresciana.qxd - Brixia Sacra

BASSA ORIENTALE
In posterum parochus sacerdotem perpetuo teneat idoneum a reverendissimo
ordinario ad curam animarum exercendam approbatum, qui una
secum curae onus subeat atque sacramenta ministret, eique congruam mercedem
reverendissimi ordinarii iudicio praestabit, uti hactenus retinere consuevisse
compertum est in visitatione. Ipsius vero reverendissimi ordinarii
erit, ut illi oneri satisfiat coadiutoriam perpetuam quamprimum erigere in
personam unius sacerdotis secularis, cui ex bonis stabilibus parochialis
ecclesiae certam et congruam portionem pro vitae sustentatione assignet.
Ecclesia amplietur, et ad decentiorem formam redigatur iudicio reverendissimi
episcopi et architecti, [f. 213v] impensis communitatis, quae
etiam in futurum dictam ecclesiam, ut necessitas postulaverit, reparare et
ornare suis impensis debebit, quemadmodum vi transactionis et obligationis
factae coram reverendissimo episcopo Bollano se obstrinxerunt; eam
vero ampliare infra annum incipiat, quo termino elapso, non celebretur in
dicta ecclesia. Fenestrae, et praesertim orbis qui est super porta maiori,
amplientur. Construantur capellae ad formam niciae, quae latitudine et
longitudine instructionibus praescripta constent, et in illis erigantur altaria
ad formam, et clathris ferreis claudantur.
Confratres Sanctissimi Sacramenti construant capellam cum altari ad
praescriptam formam, et clathris ferreis septam, quam capellam paramentis
propriis ornent; ipsa tamen paramenta communia sint etiam altari maiori,
in quo locatum est Sanctissimum Sacramentum, praesertim diebus
solemnibus et quando populo ipsum Sacramentum exponitur adorandum.
Confratres societatis Rosarii et Conceptionis propria altaria ornent, et ad
praescriptum instructionum sepiant et redigant.
Parochus ex fructibus beneficii retineat clericum, qui idoneus sit, et
semper in habitu et tonsura incedat.
Planetae duae, altera coloris violacei, altera albi pro diebus festis fiant
impensis parochi. Item purificatoria 40 et corporalia tria cum quinque sacculis,
et tot velis pro calicibus varii coloris pro varietate temporis ad praescriptum
instructionum. Planeta cum binis dalmaticis, et pluviale albi coloris
emantur impensis curati, societatis Corporis Christi et communitatis. Cinguli
tres fiant, et missale unum pro sacristia ematur. Calices inaurentur. [f.
214r] Tollatur poenitus cubiculum, quod est super sacristia, nec in eo deinceps
dormiatur sub poena 50 ducatorum sacristiae applicandorum, quo cubiculo
oblato ibi fiat fenestella, unde capella maior lumen percipere possit.
315