san carlo 2 bassa bresciana.qxd - Brixia Sacra

BRIXIA SACRA
struendis muris lateralibus, ut in ea aliqua inania spacia sub arcubus relinquantur,
ubi construendae erunt capellae, quae tamen maceria obstrui poterunt,
donec capellae exaedificabuntur. Capellae maiores omnes, una eademque
latitudine, longitudine, altitudine et structura constent; ac demum
omni ex parte sibi invicem conveniant, nec plus uno gradu ad eas assensus
fiat. Ostia lateralia, quoad fieri potest, vitentur, sed tres ianuae in fronte
ecclesiae construentur. Tectum quamvis laqueato opere construi possit,
tutius tamen ab incendio aedificium [f. 205r] est, si opere fornicato fiet, sed
hac ratione construetur, muros laterales crassiores adhibere necesse est.
Abbas et fratres pro tempore monasterii Sanctae Mariae de Gradario
Mantuae ordinis Montis Oliveti, cui monasterio haec ecclesia dicitur unita,
ad praescriptum etiam declarationis per praefatum illustrissimum visitatorem
factae, de qua in actis visitationis, praestent infrascripta, scilicet. Eligant
et praesentent perpetuo reverendissimo pro tempore episcopo brixiensi
duos sacerdotes ex eorum religione, ordineve, qui quidem vita, et moribus
et scientia ab eodem episcopo probati, impensis beneficii resideant in hac
ecclesia et in ea uterque missae sacrificium faciat singulis diebus festis, et
praeterea uterque in eadem ecclesia ter in hebdomada saltem ad praescriptum
concilii provincialis Mediolanensis celebret; alterque ex ipsis sacerdotibus
curati vices gerat, alter vero ad munus etiam curae animarum admissus
coadiutoris personam sustineat, qui coniunctim sacramenta omnia ministrent,
et ipsi duo sacerdotes subiaceant in omnibus correctioni et iussioni
reverendissimi episcopi. Praeterea abbas et fratres ipsi pro tempore manuteneant
sacristam, et ex redditibus beneficii comparent calices et alia vasa
sacra, nec non paramenta omnia varii coloris, etiam serica, quae pro ratione
temporis iuxta ritum ecclesiae ad praescriptum instructionum huius provinciae
de suppellectili ecclesiastica, et ordinationum infrascriptarum, fuerint
necessaria perpetuis temporibus pro ornamentis altarium et celebratione
missarum, ac etiam parochiales aedes construere, quae ecclesiae inhaereant.
Item ad eiusdem declarationis praescriptum communitas et homines
construant et amplient, perpetuisque temporibus hanc ecclesiam parochialem
eorum sumptibus reparent in ea forma quae supra demonstrata est,
una cum capella ad usum baptisterii, quod [f. 205v] etiam eorum impensis
fiat atque ornetur, sepiaturve ad praescriptum ordinationum praedictarum,
excepta capella maiori, quam construant, et etiam perpetuo reparent ipsi
abbas et fratres pro tempore ad praescriptum etiam instructionum.
266