san carlo 2 bassa bresciana.qxd - Brixia Sacra

BASSA ORIENTALE
[b.] [f. 191r] In ecclesiae Sanctae Mariae Medularum
Tabernaculum ligneum ad decentiorem formam reducatur, et intus circumvestiatur
panno serico. [f. 191v] Conopea ad illus tegendum habeantur, et
colorum prout ecclesia pro temporum diversitate utitur, idque totum
impensis Corporis Christi praestetur. Pixides duae comparentur, altera
maior et decens ad usum communionis populo ministrandae, altera vero
minor pro Sanctissimo Sacramento ad infirmos deferendo. Tabernaculum
gestatorium redigatur ad formam pro maiori reverentia et ornatu sacrarum
reliquiarum.
Baptisterium, si ecclesiam ampliari contigerit, exportetur in primam
capellam ad hunc usum construendam in ingressu ecclesiae a parte septentrionali;
si vero ecclesia non ampliabitur, reportetur in capella Sancti Antonii,
quae est a parte meridionali, et clathra ferrea sepiatur. Vascula oleorum
sacrorum redigantur ad formam.
Ecclesia amplietur, extruaturque altera propterea navis a parte septentrionali,
quae respondeat navi meridionali impensis communitatis, ut litteris
publicis ad illustrissimum missis pollicita est. Capella maior amplietur a
parte posteriori, ita ut in platea seu via formam exhibeat quadratam, octangulamve,
vel sexangularem. Et interim altare maius, quod de praesenti est
extra arcum capellae, reportetur intus capellae, relicto spatio inter parietem
et altare ad formam instructionum. Altaria lateralia a partibus altaris maioris
tollantur infra octo dies, et ad illa interim non celebretur, et oneri satisfiat
ad altare maius. Organum accommodetur super unum ex altaribus
demoliendis, quae sunt a latere altaris maioris. In capite navis obturato
ostio cum muro construatur capella, ad quam transferri [f. 192r] poterit
capella societatis Corporis Christi. Ne in posterum layci praesbiterium,
seu chorum, neque sacristiam ingrediantur. Ne deinceps cubicola super
navi ecclesiae constructa usui rebus prophanis sint, nec etiam concionatoris
habitatione concedantur. Coemiterium valvis quamprimum claudatur
impensis communitatis.
Quamprimum emantur aedes ecclesiae inhaerentes pro archipresbitero.
Archipresbiter teneat clericum ex fructibus beneficii, qui idoneus sit, et
semper incedat in habitu et tonsura. Archipresbiter in posterum habitet
aedes inhaerentes ecclesiae et sacristiae, pro cuius usui sint etiam aedes
communitatis eisdem aedibus inhaerentes.
239