san carlo 2 bassa bresciana.qxd - Brixia Sacra

BASSA ORIENTALE
Capella Sancti Rochi, quam susceperunt in protectione familiae de Magistris
et de Messinis, provideatur ab eisdem de paramentis et suppellectili
necessaria, illamque clathra ferrea sepiatur, quibus familiis si de hoc altare
ornando ac dotando, ut in eo celebrari possit ter in singula hebdomada se
obstrinxerint, concedatur ut sepulturam ante ipsum altare pro eis construere
possint. [f. 188r] 2 Earundem impensis reformetur ex historiae veritate
imago sancti Rochi, et Angeli ei medentis. Capella Purificationis Beatae
Mariae transferatur ad latus meridionale e regione capellae Corporis Christi,
sed ea forma illic exaedificetur, ut capellae praedictae Sanctissimi Sacramenti
respondeat, et hoc impensis confraternitatis Purificationis Beatae Verginis.
Altare vero Sanctae Luciae transferatur in capellam, ubi de praesenti est
altare Purificationis Beatae Mariae, et concedatur confraternitati Disciplinatorum.
Altare eiusdem Sanctae Luciae redigatur ad formam, auferanturque
gradus lignei, qui a parte posteriori aptati sunt. Capella Sancti Antonii
ex devotione agricolarum ornata, sepiatur clathra ferrea impensis eorundem.
Altare restringatur remotis gradibus, et celebrans intus clathrae, ut
sacerdos possit commode celebrare. Ornetur suppellectili necessaria, et
decenti ad celebrationem dictorum agricolarum impensis.
Capella Sancti Petri in Cathedra, quae est sub protectione familiae de
Norianis reducatur ad formam aliarum capellarum. Altare gradibus posterioribus
amotis, inhaereat parieti, ornetur etiam de cruce, candelabris, et alia suppellectili
necessaria. Capella Sancti Sebastiani, quae est sub protectione familiae
de Fanellis ita perficiatur, ut eandem aliarum capellarum formam exhibeat.
Altare quod est nimis angustum ad formam redigatur, ornetur etiam de
rebus necessariis, tum ad celebrationem, tum ad decentiam. Capellae omnes
ita constitutae sint, earumque altaria ita parieti inhaereant, ut [f. 188v] latitudine,
et longitudine, atque altitudine respondeant, et aequali clathra sepiantur.
Procuretur apud reverendissimum ordinarium pro consecratione huius
ecclesiae. Baptisterium exportetur penes parietem inter duo pila septentrionem
versus, et desuper fornix extruatur, clathraque ferrea sepiatur. In
hac ecclesia confessionalia quatuor ad formam sint. Archipresbiter retineat
ex fructibus beneficii perpetuo clericum, qui idoneus sit, et semper in habitu
et tonsura incedat. Alius sit clericus pariter idoneus, qui teneatur perpetuo
sumptibus duorum canonicorum et capellaniarum, et societatum pro
rata. Laycis non conceditur ingressus in sacristiam, neque in praesbiterum
intra cancellos.
227