genero- asimetria langabeziaren irudikapen sozialean - Euskara

HURBILPEN METODOLOGIKOA
2.1. GOGORA-EKARTZEA: ASOZIAZIO ASKEKO TEKNIKA
Asoziazioan oinarritutako estrategiaren interesa irudikapen sozialen
inguruko hainbat ikerketetan mahairatu izan da (asoziazioan oinarritutako
estrategien inguruko informazioan sakontzeko ikus Abric, 1994c; De Rosa, 1995; Di
Giacomo, 1981; Flament eta Rouquette 2003e), lortzen dituzten datuen
kalitatearengatik. Irudikapena osatzen duten hitzen inguruko hurbilpena egiteko,
asoziazioan oinarritutako estrategia bereziki egokia suertatzen da eta gainera,
ezagutza partekatuaren egitura aztertzeko aukera eskaintzen du.
2.1.1. Teknikaren oinarriak
Asoziazioko estrategiaren barnean, gogora-ekartzeko teknika aukeratu da
(Vergès, 1992; 1994), “association libre continuée” teknika bezala ere izendatua dena
(Flament eta Rouquette, 2003e). Asoziazioan oinarritutako prozeduretan,
induktorearen eta induzituaren arteko harremana lortu nahi da. Gehienetan,
induktorea (estimulua), termino edota sintagma bat da. Gogora-ekartzeko
teknikarekin, partehartzaileei hitz induktore baten eraginez burura datozkien hitz
edo eta espresioen ekoizpena eskatzen zaie. Vergès-ek adibidez, diruaren inguruko
irudikapena aztertzeko planteatutako galdera honakoa da: “Quels sont pour vous les
mots ou expressions auxquels vous fait penser l´argent? (Vergès, 1992, 203 or.). Gure
kasuan, langabeziaren irudikapen soziala eta bertan lanaren banaketa sexualak izan
dezakeen isla aztertzeko, hiru estimulu erabili dira: “langabezia”, “gizon langabetua”
eta “emakume langabetua”. Gizon langabetuaren kasuan adibidez, galdera
honelakoa da (erabilitako galdesorten eredu bat, frantsesez, 1.eranskinean dago):
“Zein hitz edo eta espresio datorkizu gogora gizon langabetu batengan pentsatzerakoan?”
Teknika honen bidez lortutako erantzunak, maiztasunaren eta heinaren batez
bestekoaren gurutzaketari esker azter daitezke. Maiztasunak, inkestaturiko
populazioan hitza zenbatetan aipatu den adierazten du eta heinak (populazio osotik
kalkulatzen den batez besteko heina), hitzak asoziazioan aurkezten duen lekuari
dagokio (Vergès, 1992; 1994). Maiztasuna eta heinaren arteko gurutzaketari esker,
informazioa 2x2ko taula batean banatua aurkitzen da (ikus 1. Irudia).
79