genero- asimetria langabeziaren irudikapen sozialean - Euskara

284
LANGABEZIA FEMENINOA ETA MASKULINOA: GENERO-ASIMETRIA …
gehiago ematen dituzte. Ikerketa hau aurrera eraman aurretik, ikertzaileek jadanik
aztertua zuten orokorrean letretako ikasleak zuzenbide fakultateko ikasleak baino
toleranteagotzat jotzen zirela eta, era berean, arrazakeriaren kontrako arau
zurrunagoak zituztela pentsatzen zela. Teknika honi jarraiki, arauen kontrako ideiak
errazago adierazten dira hurbilekoa ez den eta norberaren erreferentzia sistema bera
partekatzen ez duen pertsonaren aurrean.
Beste maila batetan, langabeziaren egituraren azterketarekin jarraituz, gure
ikerketan jasotako emaitzen arabera, langabeziaren irudikapenean bazterketa soziala
funtsezko elementua da Frantziako Estatuari loturik aurkitzen diren taldeentzako eta
ez ordea, Espainiako Estatuari loturik aurkitzen den taldearentzako. Emaitza hauek
etorkizuneko ikerketetan berrestearekin batera, egitura sozialen eta irudikapen
sozialen arteko harremanei helduz bi gune ezberdin egoteak dituen inplikazio
teorikoetan eta praktikoetan sakontzea beharrezkoa da. Izan ere, Paugam eta Selz-ek
(2005) nazioarteko mailan pobreziaren irudikapen sozialaren inguruan aurkitutako
desberdintasunen oinarrian, joera ekonomikoez gain, herrialdeen instituzio eta
egiturak ere kokatzen dituzte. Maila honetan, instituzioek gizartearen marko mentala
mantentzen duten neurrian, hausnarketa esanguratsua litzateke hiritar
pentsalariaren, hiritar pentsatuaren eta hiritar aktorearen arteko harremanetan
sakontzea (Flament eta Rouquette, 2003e).
Azkenik, emakumeek jasaten duten zapalkuntzari begira, eraldaketa
prozesuak bereziki interesatzen zaizkigu. Lan honetan langabeziaren irudikapen
sozialean genero-asimetriaren eragina nabarmendu da. Genero-asimetriaren
printzipio antolatzailea gizonek emakumeekiko duten dominazio harremana izanik
(Daune-Richard eta Hurtig, 1995), sistema ideologiko moduan funtzionatzen du eta
mota ezberdinetako irudikapen sozialetan etengabe birsortzen da. Baliabide
ideologiko moduan beraz, aldaketarako belaunaldiak behar dira eta testuinguruaren,
harreman sozialen eta praktika ezberdinen eraldaketan lan sakona (Flament eta
Rouquette, 2003b). Aldaketari heltzeko beraz, konformitateren prozesuak aztertzeaz
gain, disidentziazko edota erresistentziazko prozesuetara hurbiltzea bereziki
interesgarria izan daiteke, emakumeen eskubideen defentsan dabiltzan talde
feministetara adibidez.