genero- asimetria langabeziaren irudikapen sozialean - Euskara

70
LANGABEZIA FEMENINOA ETA MASKULINOA: GENERO-ASIMETRIA …
batez bestekotik goragoko tasak ematen dira, Frantzian % 8,6koa eta Espainian %
8koa. Gizon eta emakumeen langabezia-tasetan, bai Frantzian bai eta Espainian ere,
emakumezkoek langabezia tasa handiagoa dute, gizon eta emakumeen arteko
distantzia, Espainiaren kasuan nabarmenagoa bada ere. Hau da, Frantzian
gizonezkoen langabezia tasa % 8koa da eta emakumezkoena, % 9,3koa. Espainian,
berriz, gizonezkoen langabezia tasa % 6,3koa da eta emakumezkoena, % 10,5ekoa.
Gazteei dagokienez, Frantzian eta Espainian, langabezia-tasa handiak daude,
Frantzian % 21,6a eta Espainian % 18,5a.
Langabeziaren inguruko datu hauen aurrean, garbi dago emakumeak
langabeziaren aurrean bereziki kalteberak direla. Gainera, nabarmentzekoa da
gazteen artean dagoen langabezia-tasa altua. Enplegua gizarte produktiboan
sartzeko modua da, gazteentzako bereziki. Lanbideratzean, gazteen identitatearen
sendotzea ematen da. Hau da, lan munduan rol batzuk garatzen dira. Egungo
gizartean denbora eta espazioaren antolakuntza lanaren inguruan egiten da, jasotako
ezagupenak praktikan jartzeko modua da, okupazio zehatz bat garatzea
ahalbidetzen du, familia nuklearretik independizatzeko aukera ematen du eta
etorkizuneko bizitzaren planen inguruko igurikimenak sortzea (Aguilló, 1998;
Jahoda, 1981, Peiró eta kol., 1993). Azken finean, nerabezaroaren amaiera eta helduen
mundurako sarbidea dakar (Tiggermann eta Winefield, 1984; Warr, 1987). Era
berean, gure gizarteetan, lana oinarrizko balioa da (Serrano, Moreno eta Crespo,
2001) eta enplegurik gabe egotea gaitzesgarria da, langabeziari buruzko
irudikapenak, jarrerak eta jokabideak sortarazten dituelarik (Fraser, 1980).
Langabezia masiboaren aurrean orientazio profesionalaren esparruan erronka
berriak plazaratzen dira (Ovejero, 2001) eta bereziki generoko desberdintasunen
inguruko hausnarketa sakona egitea dakar (Duru-Bellat, 2003). Maila honetan,
gazteek langabeziaren inguruan duten irudikapen sozialarekiko hurbilpena egitea
bereziki interesgarria izan daiteke.
5. IKERKETA HELBURUAK ETA HIPOTESIAK
Ikerketa honen helburu nagusia gazteek langabeziaren inguruan duten
irudikapenean, genero-sistemak jokatzen duen papera aztertzea izan da.