genero- asimetria langabeziaren irudikapen sozialean - Euskara

HURBILPEN TEORIKOA
Sortutako baldintza berriak etorkizunik gabekoak direla pentsatzen da. Egoera hau,
Flament-ek (1994a) berak aipatzen dituen bi adibide hauen bidez ikus daiteke.
Lehena emakume eta gizonen rol banaketekin lotuta eta bigarrena, tradizio
kulturalekin (bikote harremanekin).
Lanari loturiko rol tradizionalen banaketak apurtuz, 1914-1918ko gerrate
garaian emakumeen laneratze masiboa eman zen industria astunean. Gerra aurretik,
industria astuneko lana emakumeek burutzea ez zen onargarritzat jotzen, oso kasu
berezietan salbu. Guda egoerak, berriz, praktika hauek egunerokoak bihurtu zituen.
Hala ere, bakearekin batera, gerra-aurreko praktika sozialak berrezarri ziren. Kasu
honetan, beraz, egoera itzulgarri hautematen da eta irudikapena ez da aldatzen.
Egoera itzulgarri hautematen den beste kasu bat Frantzian goi mailako
ikasketak burutzen diharduten afrikar edota malgatxeen egoera dugu. Ikasle hauek,
goi mailako ikasketak amaitzen emandako urteak maiz bikote elkarbizitzan ematen
dituzte (ezkondu gabeko bikoteetan), beraien jatorrizko kulturan pentsaezina dena.
Guztiek egoera hau parentesi tenporal eta geografiko moduan bizi dute eta gehienek
bikoteko bizitza honen beharra azpimarratzen eta justifikatzen dute, erbesteratzea
dela eta, isolamenduarekin amaitzeko.
Egoeraren itzulezintasuna
Egoeraren itzulezintasuna hautematen denean, eraldaketarako prozesua
eman daiteke, kasu honetan hiru eraldaketa mota bereiz daitezke (Abric, 1994c):
eraldaketa progresiboa, eraldaketa erresistentea eta eraldaketa bortitza.
1. Eraldaketa progresiboa
Eraldaketa progresiboaz hitz egin daiteke irudikapenean hausturarik gabeko
eraldaketa ematen denean. Hau da, gune zentrala zatikatu gabeko eraldaketa ematen
denean. Praktika berriek aktibatutako elementuak gune zentralekoekin progresiboki
integratzen doaz eta ondorioz, elkarren artean bat egiten dute gune berri bat
osatzeko, irudikapen berri bat osatzeko, alegia. Kasu hau Guimelli-k (1988) ehizaren
inguruan egindako ikerketari dagokio. 1952an jazotako eritasunak, mixomatosiak,
untxi populazioan sarraskia ekarri zuen. Egoera honen aurrean, ehiztariek hain
33