genero- asimetria langabeziaren irudikapen sozialean - Euskara

TEORIATIK IKERKETA OBJEKTURA
Industrializazioak, beste hainbat gauzaren artean, lanaren etika ekarri zuen. Lanaren
etikak sortutako orden berria berresteko funtzio ideologikoa zuen. Langile
ikuspuntutik eman ziren lehendabiziko borrokak, industrializazioarekin agertu zen
lanaren ikuspegi berriari aurre egiten eman ziren. Industrializazioak egitura
sozialean aldaketa sakonak eragin zituen eta langile-klase sozialari bide eman zion.
XIX. mendean, langile mugimendua sortu zen. Langileen aberastasun iturri bakarra
beren lan indarra zen eta, beraz, soldatapeko izaerak langileen artean lotura komuna
osatzen zuen. Hasieran, langileen eta beren familien bizitza-baldintzak dramatikoak
ziren (Engels, 1976). Kasu askotan, aurreko garaietako egoerarekin konparatuz gero,
okerrera egin zuen. Egoera honek klase kontzientzia bultzatu zuen. Klase
kontzientzia ugazaba eta langileen arteko aurkaritzan eta langile izaeran
oinarritutako identitatean sendotu zen. XIX. mende bukaeran, industrializazioa
aurreratua dagoen herrialdeetan batez ere, Britainia Handian eta Europako iparralde
eta erdialdean, sindikatuek indarra hartu zuten, langile mugimenduarekin eta izaera
sozialdemokratako alderdiekin batera (Moreno, 2003). Honek lan harreman berriak
zabaldu zituen, langile-klasea antolatzen hasi zen eta lan esparruan eragiteko
gaitasuna hartu zuen. Langile mugimendua, lan-jardueran oinarrituta, barne-
kohesioa lortu zuen. Kapitala komunitatetik kanpo kokatzen zen etsaia zen. Lana ez
zen lan esparrura mugatzen, kultura eta langile-identitatea bideratzen zituen.
Enpleguarekiko harremanak langile klasearen bizitza estiloa zuzentzen zuen, bere
bizimodua eta harreman sozialak definitzen zituen.
Sindikalismoak historikoki emakumeak baztertu izan ditu. XX. mende
hasierarte sindikatu gehienek ez zuten emakumeen partaidetza onartu. Emakumeek
gizonezkoek baino gutxiago kobratzen zuten eta, dirudienez, hau izan da
sindikatuetatik baztertzeko erabilitako arrazoi nagusienetako bat (Hartmann, 1994).
Sindikatuek emakumeekiko zuten jarrera baztertzaileak eta industrializazioak
eragiten zuen banaketa sexualak lan produktiboaren eta ugalketara dedikatutako
jardueren artean banaketa sakona eragin zuen. Langileen mugimenduaren barnean,
emakumearen irudi eta papera etxekoandrean oinarritzen zen, emakumearen lan
ordainduak industrializazio hasieran izan zuen garrantzia azpimarratzen dituzten
datuak argiak badira ere.
57