genero- asimetria langabeziaren irudikapen sozialean - Euskara

HURBILPEN TEORIKOA
3.2.1. Sistema arauemailea
Flament-ek irudikapen sozialen baldintzapekotasunari buruz egindako
azterketekin (Flament, 1994a, 1994b), aldakortasun normatiboen inguruko interesa
suspertu da. Azalaldea kondizionala, baldintzapekoa da eta gune zentrala elementu
negoziaezinek eratzen dute, irudikapenak bere osotasunean sistema arauemaile bat
osatzen duelarik (Flament, 1999). Gainera, Flament-en aburuz preskripzioak nagusiki
kondizionalak dira (Flament, 2001). Baldintzapekotasun hau, Gaymard-ek (2003)
jatorri magrebtarreko neskekin negoziazio interkulturalaren inguruan burututako
ikerketan argi azaldu da. Lan honetan irudikapen sozial eta arauen arteko lotura
nagusiki azalaldean ematen dela ondorioztatzen da. Azalaldea, beraz, printzipio
absolutuekiko aldentzea justifikatzeko egokiagoa ageri da.
Arauen eratzeari helduz, Moscovici-k (1961/1976), irudikapen sozial
kontzeptuaren hasieratik, komunikazio prozesuen rola azpimarratu izan du
irudikapen sozialen sorreran eta dinamikotasunean. Eragin soziala gizakien arteko
harremanen muinean dagoela nabarmendu du. Eragin sozialak aditzera ematen du,
askotan, beste pertsonek partekatzen dituzten iritzi edota sinesmenak
ezagutzerakoan iritziz edota sinesmenez aldatzen dugula (Mugny, Oberlé eta
Beauvois, 1995). Adibidez Sheriff-ek (1966), nerabeekin konformitatearen inguruan
egindako ikerketan nabarmendu zuen, gizabanakoek beraien arau indibiduala
apurka uzten dute, partekatutako arau komun bati heltzeko. Behin arau komuna
finkatuta, maila indibidualean ere eragiten du. Ikerketa horretan argi ikusten da nola
taldeak bere erreferentzia-markoak ezartzen dituen taldekideen arteko harremanen
bidez. Objektu sozialei dagokionez, irudikapen sozialak dira, hain zuzen, egoeraren
izaera zehaztu eta interpretatzen dutenak, baina, era berean, egokituriko portaera
preskribatzen dutenak.
Doise-n lanari jarraiki (1990), irudikapen sozialen azterketari, meta-sistema
sozialak sistema kognitiboan eragiten dituen erregulazioen analisia egitea dagokio.
Erregulazio sozialen printzipio antolatzaileen eta operazio kognitiboen arteko
harremanaren azterketa ikasketa-objektu ohikoa da psikologia sozialean. Sistema
normatiboen eta operazio kognitiboen arteko harremana, diskriminazio eta
arrazakeriaren arloan eremu teoriko ezberdinetatik jorratua izan da. Besteak beste,
39