genero- asimetria langabeziaren irudikapen sozialean - Euskara

42
LANGABEZIA FEMENINOA ETA MASKULINOA: GENERO-ASIMETRIA …
multzo bat partekatzen duenean eta arau hauek gizabanakoak duen jarreran eta
portaeretan eragiten dutenean, orduan esan daiteke erreferentzia taldea dela
(Hyman, 1953). Interesgarria da, beraz, egoera eta irudikapen objektua atzemateko
kultura-eredu batetan aukeratzen diren erreferentzia taldeak ezagutzea.
Erreferentzia taldeen eragina irudikapen sozialetan aztertzen lehena Flament
(1999) izan da. Flament-en esanetan, gizabanakoen iritzien bidez, objektu baten
irudikapenean dauden eredu normatiboak atzeman ditzakegu, alegia, erreferentzia
taldeak. Hau da, irudikapen sozialen ikerketetan jasotzen diren erantzunak
irudikapen objektuarekiko egokiak diren zenbait eredu normatiboren isla dira.
Flament-ek, sistema arauemailea aztertzeko identifikazio-paradigman oinarrituz
(Jelison eta Green, 1981; Dubois, 1991; Dubois eta Beauvois, 1996; Beauvois, Gilibert,
Pansu eta Abdellaoui, 1998), operazionalizazio modu bat proposatzen du,
ordezkapen teknika erabiliaz. Flament-ek (1999) proposatutako prozedura honetan,
partehartzaile bakoitzak hasieran galdesorta estandar bati erantzuten dio eta
ondoren beste bi galdesortei erantzuten die, estandarraren berdinak direnak baina
pertsonaren iritzi propioa eskatu beharrean, beste norbaiten lekuan jarrita erantzutea
eskatzen dutenak. Prozedura honen bidez lortutako datuak erregresio anizkoitzen
bidez lantzen dira, ordezkapen kontsignetan emandako erantzunek erantzun
estandarrak aurreikusteko aukera ematen duten egiaztatzeko. Irudikapen sozialen
baitan, ordezkapen teknika erabiltzerakoan, kontsigna modu ezberdinak aurkitu
daitezke. Flament-ek (1999) erreferentzia talde batzuengandik “ondo ikusia” eta
“gaizki ikusia” izan nahi duen norbaiten lekuan erantzutea eskatzen du; Guimelli eta
Deschamp-ek (2000) “frantsesek orokorrean” emango lituzketen erantzunak eskatzen
dituzte; Campbell, Muncer, Guy eta Banim-ek (1996) beste sexukoa den pertsona
baten lekuan jarrita erantzutea eskatzen dute. Azken ikerketa honetan, erasoaren
inguruko irudikapen soziala aztertzen dute. Autore hauek lortzen dituzten emaitzen
arabera, gizonezkoek eta emakumezkoek erasoaren irudikapen desberdina badute
ere, oso ondo dakite “beste sexuko pertsonak” erasoaren inguruan duen irudikapena
zein den.
Langabeziaren irudikapenaren baitan, kasu maskulinoan eta femeninoan
martxan jartzen diren sistema normatiboen eragina aztertu nahi izan da. Gazteek