genero- asimetria langabeziaren irudikapen sozialean - Euskara

52
LANGABEZIA FEMENINOA ETA MASKULINOA: GENERO-ASIMETRIA …
biziraupenera bideratua eta langile-etiketa zuten pertsonen kategoria sozial
konkretuari inposatua. Pentsamolde modernoan, kategoria guztietako hiritarrei
bermatu beharreko eskubide bezala aldarrikatzen da. Lanaren zentraltasun
fenomenoa, Moscovici-ren irudikapen sozialen teoriaren ikuspuntutik, lanarekiko
jarrera-dimentsioan aitzinetik modernitaterako aldaketa kualitatiboa nabari da.
Eredu horren arabera, aldaketa prozesua elementu informatibo berrien
barneraketaren ondorioz ematen da, irudikapen eremuaren berrantolaketa
gestaltikoarengatik. Honek, zentzu komunaren ezagutzan, eguneroko
komunikazioen edukietan eta ekintza sozialaren eredu araukorretan eragiten du
(Blanch, 1990).
Ikerketa-gaiari heltzeko beraz, lehenik eta behin, lanak historian zehar jokatu
duen papera aztertuko da. Jarraian, langabeziaren eta langabetuarekiko gaur egungo
gizarteak dituen estereotipo ideologikoenganako hurbilpena egingo da, generoaren
araberako asimetriak gazteengan bereziki eragin ditzakeen ikusmoldeetan sakonduz.
Era berean, herrialdez herrialde langabeziaren irudikapenaren egonkortasunean zein
aldakortasunean eragin ditzaketen faktore sozial zein egiturazkoetan murgilduko
gara, Frantziako eta Espainiako Estatuen berezitasunak aztertuz. Amaitzeko,
ikerketaren helburuak eta hipotesiak zehaztuko dira.
2. LANEAN OINARRITUTAKO PENTSAMOLDEAREN
ERLATIBOTASUN HISTORIKO-KULTURALA
Gizakiaren sorreratik lana existitu izan da, baina aldatu izan dena lana
egiteko moduak eta lanarekiko jarrera sozial eta moralak izan dira. Lanarekiko
jarrera gizarte ororen egituran eta funtzionamenduan oinarrizkoa da. Lana maila
ekonomikoaz harantzago doa eta, burutzen den kulturaren menpe dagoen bezala,
kulturan bertan modu eraginkorrean eragiten du. Lanaren balorazioa eraikuntza
kultural baten emaitza da eta, beraz, denboran eta espazioan aldakorra (Blanch,
1990).
Gizarte primitiboetan, biziraupenerako jarduerak burutzen ziren. Talde
sedentarioekin, nekazaritzari eta abeltzaintzari loturiko jarduerak azaldu ziren.