genero- asimetria langabeziaren irudikapen sozialean - Euskara

I. HURBILPEN TEORIKOA
1. Sarrera
Industria-ondoko gure gizarteetan, langabezia arazo sozial gisa ulertzen da.
Bai komunikabideetan, bai eta pertsonarteko elkarrizketetan erreferentzia ohikoa da.
Zer da baina langabezian egotea? Emakume langabetua edota gizon langabetua
izatea gauza bera al da? Galdera hauei erantzun nahian, irudikapen sozialen bidezko
hurbilpena egin da. Hurrengo orrialdeetan beraz, irudikapen sozialen teoriaren
nondik norakoak garatuko dira. Batetik, eragin teoriko nagusiak azalduko dira. Hala
nola, Durkheim-en irudikapen kolektiboak, Heider-ren zentzu komunaren
psikologia eta Berger eta Luckman-en errealitatearen eraikuntza soziala. Era berean,
irudikapen sozialen sorrerari heltzeko, objektibazio eta ainguratze prozesuak
aurkeztuko dira. Bestetik, irudikapen sozialak atzemateko hautatutako hurbilpena
garatuko da, Gune Zentralaren Teoria hain zuzen. Ondoren, irudikapen sozialen
aldaketa-prozesuei helduko zaie, irudikapen sozialen eta praktiken arteko
harremana aztertuz. Era berean, irudikapen sozialen sistema arauemailea aztertzeko
erreferenteen bidezko hurbilpena proposatuko da eta azkenik, gizon eta emakumeen
arteko harremanak aztertzeko erabilgarri izan daitezkeen bi kontzeptu nagusiri
helduko zaie, genero-asimetriari eta thêmatei.
2. IRUDIKAPEN SOZIALEN HURBILPENA
Irudikapen sozialen teoriaren jatorria, Moscovici-k 1961ean “La
psychanalyse, son image et son public” publikaturiko tesian koka daiteke. Lan
horretan, Moscovici-k pentsamendu sozialaren izaera aztergaitzat du. Psikoanalisia
abiapuntutzat hartuta, garaiko teoria zientifiko edo politiko berria, kultura batetan
nola barreiatzen den eta prozesu horretan zehar nola eraldatzen den azaltzen du.
Gainera, teoria berri honek pertsonak beren buruekiko eta bizi diren munduarekiko
duten ikuspegia nola eraldatzen duen azaltzen du (Farr, 1984). Hau da,
psikoanalisiaren irudikapena abiapuntu izanik, irudikapen sozialen eratze eta