genero- asimetria langabeziaren irudikapen sozialean - Euskara

30
LANGABEZIA FEMENINOA ETA MASKULINOA: GENERO-ASIMETRIA …
eragiten diotela esaterakoan (Abric, 1994c). Interakzioa honela uler daiteke: praktikak
irudikapenarentzat informazio-zama dira eta irudikapenek, bestalde, ingurunean
eragiten dute. Baieztapen honetatik abiatuta ere, egokia deritzogu harreman honetan
sakontzeko Abric-ek (1994c) eta Flament-ek (1994a) egoeraren izaera aintzat hartuta
burututako hausnarketak eztabaidara ekartzeari. Ondorengo orrialdeetan, beraz,
harreman honetan, batetik, irudikapenen papera azpimarratzen duten zenbait
ikerketa eta planteamendu azalduko da eta, bestetik, eraldaketa motei arreta berezia
eskainiaz, praktiken papera azpimarratzen duten ikerketa eta planteamenduen
azalpenak garatuko dira.
3.1.2.1. Irudikapenek praktikak mugatzen dituztenean
Abric-ek (1994c, 222-229 orr.) “Pratiques sociales et représentations”
izenburupeko liburuan, irudikapenek praktikak mugatzen dituztela aditzera ematen
duten hainbat ikerketa aipatzen ditu. Abric eta Vacherot-ek (1976), adibidez, jarduera
berdin baten irudikapen ezberdinek, subjektuengan jokaera desberdinak eragiten
dituztela ondorioztatzen dute. Hau da, burutu beharreko jarduera arazo baten
konponbidean oinarritzen dela esateak edo joko-jarduera bezala aurkezteak jokaera
desberdinak eragiten ditu. Jarduera joko moduan aurkezten zenean, partehartzaileek
modu lehiakorragoan jokatzen zuten. Landa-lanei dagokienez, aipatzekoa da Jodelet-
ek (1989) eromenaren inguruan burututako ikerketa. Ikerketa honetan, gaixoen
harrera-familiek, bi oinarrizko informazioen inguruan antolatzen eta sailkatzen dute
gaixotasun mentalaren irudikapena, “nerbiotako gaixotasuna” edo “burmuineko
gaixotasuna”. Gaixotasunaren diagnostikoa bi elementu hauen arabera egiten da eta,
ondorioz, eratorritako irudikapenak praktikak aurreikusteko, bideratzeko eta
justifikatzeko balio du.
Flament-ek (2001) bere aldetik, Jodelet-ek eromenaren inguruan burututako
ikerketa klasikoari heltzen dio, kausalitate sinplea edo interakzioa dagoen argitzeko.
Jodelet-ek eromenaren inguruan burututako ikerketa egin eta hogei urtetara,
Pradeilles-en (1992, Flament-ek aipatua, 2001) eromenari buruzko ikerketan, gogora-
ekartze masibo moduan “nerbio-depresioa” azaltzen da, Jodeleten ikerketan inola
ere azaltzen ez zena. Flament-ek bere analisian, irudikapena baldintzapenez hornitua