genero- asimetria langabeziaren irudikapen sozialean - Euskara

IKERKETAREN EMAITZAK
3. KARAKTERIZAZIO GALDESORTAK
3.1. SARRERA ETA HELBURU ZEHATZAK
Hierarkizazio kolektiboan oinarritzen den galdesorta honekin, langabezia
ezaugarritzen duten elementuak identifikatu nahi dira, bi mailatan: langabezia
orokorrean eta pertsona baten kasu partikularrean, gizon baten kasuan eta emakume
baten kasuan. Hau da, gizon eta emakume hitzak estimulutzat harturik, generoan
oinarritutako kategorizazio sozialaren eraginak aztertu nahi dira. Helburu hau
lortzeko, beraz, hiru karakterizazio galdera planteatu dira, langabezia orokorrari
buruz, langabezia maskulinoari buruz eta langabezia femeninoari buruz.
Karakterizazio galdesortetan lortutako informazioa batetik, galdesorta
bakoitzaren itemen agerikotasunaren arabera aztertu da eta bestetik, galdesorten
arteko konparaketa egin da. Agerikotasuna, item baten zentraltasunaren hipotesia
egitea ahalbidetzen duen neurria da eta bi indizeei esker lortzen dugu: indize-
efektiboa eta item bakoitzaren puntuaketen banaketa. Indize-efektiboak galdesorta
bakoitzaren (langabezia orokorra, langabezia maskulinoa eta langabezia femeninoa)
elementu aukeratuenak erakusten dizkigu. Gure kasuan ikasleen erdiak behintzat
aukeratutako elementuak kontutan hartuko ditugu (indize-efektiboa % 50atik
gorakoa duten itemak). Itemen puntuaketen banaketari dagokionez, item bat
karakteristikotzat hartzeko, bere puntuaketak « j » moduko banaketa jarraitu behar
du (Vergès, 1995, 2001). Beste era batera esanda, gune zentraleko item batek,
populazioan partekatua izateaz gain (indize-efektibo altukoa), irudikapena antolatu
behar du, hau da, bakoitzarentzako beharrezkoa izan behar du. Galdesorten arteko
konparaketa bestetik, bi eratara egingo da. Batetik, galdesorta bakoitzak aurkezten
duen sailkapenaren arabera (Kendall Tau-a) eta galdesorta bakoitzean itemek
jarraitzen duten banaketaren arabera (Kolmogorov-Smirnov testa) egingo da.
Kolmogorov-Smirnov testa, bi banaketen konparaketa egiteko erabiltzen da
eta gure kasuan, langabezia orokorrean, langabezia maskulinoan eta langabezia
femeninoan lortutako datuak konparatzeaz gain, kasu bakoitzean gizonek eta
emakumeek emandako erantzunak konparatzeko erabiliko da.
183