genero- asimetria langabeziaren irudikapen sozialean - Euskara

144
LANGABEZIA FEMENINOA ETA MASKULINOA: GENERO-ASIMETRIA …
laginek, lehen periferian baztertze soziala aipatzen dute eta Irungoek berriz ez.
Elementu honekiko desberdintasuna ere, langabezia maskulinoaren eta
femeninoaren kasuan emango da. Gainera, Errefusapen galdesortetan lortutako
emaitzen arabera (ikus ikerketaren emaitzak ataleko 4.4. puntua), Aix-en-provenceko
eta Baiona-Bidarteko ikasleen kasuan ez bezala, Irungo ikasleek bazterketa soziala ez
dute langabeziaren irudikapenean elementu zentraltzat jotzen. Guzti honetan
zeresanik izan dezake historikoki estatu bakoitzean babes sozialerako sistemak izan
duen garapenak (Rodríguez de Las Heras, 2003). Ildo honetan kontutan hartzekoa da
bazterketa sozial kontzeptuaren erabileraren jatorria, Frantzian hirurogeita
hamargarren hamarkadan izandako eztabaida ideologiko eta politikoan kokatu
behar dela (Abrahamson, 1997).
Langabezia maskulinoaren kasuan, hiru laginetan elementu antolatzaile
berdinak aurkitu dira. Gizon langabetua, enplegurik ez duen eta enplegua bilatzen
duen gizona da. Langabezian egoteak, arazo eta zailtasun ezberdinak dakarzkio,
maila ekonomikoan, indibidualean eta familiarrean.
Langabezia femeninoaren kasuan, hiru laginetan elementu antolatzaile
berdinak aurkitu dira. Emakume langabetua, enplegurik ez duen eta enplegua
bilatzen duen emakumea da. Langabezian egoteak, arazo eta zailtasunak dakarzkio
maila ezberdinetan, ekonomikoan besteak beste. Elementu hauek, langabezia
orokorraren kasuan eta langabezia maskulinoaren kasuan ere aurkitutako
elementuak dira. Emakume langabetuen kasuan ordea, elementu bereizgarriak
aurkitu dira hiru laginetan. Batetik, emakumeen rol tradizionala azaleratu da eta
bestetik, gizartean emakumeek pairatzen duten diskriminazioa nabarmendu da.
2.3. ANALISI KATEGORIALA
Analisi prototipikoan, maiztasun minimo bateko hitzak aztertzen dira.
Analisi kategorialean berriz, partehartzaileek emandako hitz guztiekin lan egiten da.
Hala ere, sortutako kategoriak "gogora-ekartze" galdesortetan lortutako datuetatik
eratortzen dira, dimentsio gehienak analisi prototipikoan identifikatuak izan
direlarik.