genero- asimetria langabeziaren irudikapen sozialean - Euskara

256
LANGABEZIA FEMENINOA ETA MASKULINOA: GENERO-ASIMETRIA …
Bestalde, kontutan hartzekoa da prestakuntzak, formazioak aurkezten duen
garrantzia. Izan ere, langabetua, neurri batean, formaziorik gabeko pertsona dela
esaten baita. Langabezia femeninoari dagokionez, enplegurik ez duen eta zailtasun
ekonomikoak bizi dituen emakumea da baina, era berean, zenbait berezitasun
aurkezten ditu, generoarekiko asimetriaren arabera egituratua baitago. Hau da,
emakume langabetuaren kasuan, zailtasunak emakumea izanagatik areagotzen dira,
emakumeek bizi duten diskriminazio egoera nabarmenduz, baina bestetik,
emakumea izanagatik arintzen dira, beti ere emakumearen rol tradizionala
bereganatzea izango baitu. Langabeziaren aurrean, estereotipo tradizionalak
indartzen direla esan daiteke, gizonaren kasuan langabeziak familia osoa aztoratzen
duen bitartean, emakume langabetuaren kasuan, familia egitura tradizionala
sendotzen baita.
Bestalde, gogora-ekartzeko datuekin burututako analisi kategorialetan,
langabezia orokorraren kasuan, kategoria partekatuenak eta lehentasunez
adierazitakoak Lanarekiko Harremana, Alderdi Ekonomikoak eta Prestazio Sozialak
dira. Irudikapen sozialean jokatzen duten papera zehazteko, kookurrentzia
indizearen bidez burututako similitude analisietan, langabezia orokorra, Lanarekiko
Harremanaren eta Alderdi Ekonomikoen inguruan antolatzen da. Bi kategoria hauek
partekatuenak izateaz gain, kategoria konexuenak dira. Hau da, bi dimentsio hauek
dira beste kategoriekin lotura gehien mantentzen dituztenak, beraien artean ere
lotura estua mantentzen dutelarik. Langabezia maskulinoaren kasuan, kategoria
partekatuenak eta lehentasunez adierazitakoak, Lanarekiko Harremana, Alderdi
Ekonomikoak eta Alderdi Indibidualak dira, gainera kookurrentzia indizearen bidez
burututako analisiaren arabera, beste kategoriekin lotura gehien mantentzen
dituzten kategoriak dira. Langabezia femeninoaren kasuan, kategoria partekatuenak
eta lehentasunez adierazitakoak, Lanarekiko Harremana, Familia eta Alderdi
Sozialak dira. Kookurrentzia indizearen bidez burututako analisien arabera,
langabezia femeninoa, Lanaren eta Familiaren inguruan antolatzen da. Bi dimentsio
hauek, beste kategoriekin lotura gehien mantentzen dituztenak dira eta, gainera,
beraien artean ere lotura estua mantentzen dute.