genero- asimetria langabeziaren irudikapen sozialean - Euskara

18
LANGABEZIA FEMENINOA ETA MASKULINOA: GENERO-ASIMETRIA …
3. Inferentziarako presioa: objektuak suspertzen duen interesa eta harreman
sozialetan duen pisua dela medio, maila sozialean inferentziarako presioa
egiten da. Objektuaren inguruan komunikatu beharra dago, iritziak, jarrerak
eta jokaerak hartu.
Moscovici-k aipatzen dituen hiru baldintza hauek orokorrean onartuak
badira ere, irudikapen sozialaren sorreraren inguruko lanak eskasak dira eta beraz
planteamendu honen baliozkotasuna edota hiru baldintza hauen nahikotasuna
neurri batean frogatu gabea da (Roussiau eta Bonardi, 2001).
Flament eta Rouquette-ek (2003b), beste maila batetan, zerbait irudikapen
objektu izateko gutxieneko bi baldintza eman behar direla adierazten dute:
agerikotasun sozio-kognitiboa eta objektuarekiko praktika. Agerikotasun sozio-
kognitiboari dagokionez, batetik , objektuak kontzeptu funtzioa bete behar du, hau
da, objektuak abstrakzio maila bat izan behar du, bertan objektu partikular multzo
bat biltzen delarik eta, bestetik, elkartrukatutako komunikazioetan maiz erreferentzia
egin behar zaio. Bestalde, irudikapen soziala eratzeko objektuarekiko praktika
komunak egon behar dira (praktika kontzeptuaren inguruko zehaztapen gehiago,
ikus hurbilpen teorikoko 3.1.2. puntuan).
2.3.3. Sorrerako prozesuak
Irudikapen sozialak errealitatearen elaborazio psikologiko eta sozialaren
prozesu eta produktutzat har daitezke (Roussiau eta Bonardi, 2001). Irudikapen
sozialen edukia anitza da. Irudikapen sozialek hainbat informazio, sinesmen, iritzi
eta jarrera multzo egituratua osatzen dute (Abric, 1996a). Irudikapen sozialak
sozialki landutako eta beraz, sozialki desberdindutako eraikuntza kognitiboak dira
(Flament eta Rouquette, 2003a). Hau dela eta, irudikapen sozialen sorrerari eta
abiarazteari dagokionez, oinarri soziologikoa aintzat hartzea beharrezkoa da.
Irudikapen sozialak komunikazio prozesuekin eta gizarteratze moduekin
elkarloturik ulertu behar dira. Irudikapen sozialen bidezko hurbilpenak gizataldeek
errealitateaz nola jabetzen diren ulertzera garamatza.
Irudikapen sozialen sorrerari dagokionez, Moscovici-k (1961/1976) bi
oinarrizko prozesu aipatzen ditu: objektibazioa eta ainguraketa. Bi prozesu hauei