genero- asimetria langabeziaren irudikapen sozialean - Euskara

264
LANGABEZIA FEMENINOA ETA MASKULINOA: GENERO-ASIMETRIA …
Karakterizazio galdesortetan, langabezia orokorra hiru elementurekin
ezaugarrituta agertzen da. Langabeziak estutasuna, estresa sortzen du, arazo
ekonomikoak dakartza eta edozein lan onartzera darama. Langabezia maskulinoa,
lau itemekin ezaugarritua agertzen da. Gizon langabetuak, estutasuna, estresa
sentitzen du, arazo ekonomikoak ditu, egoerak edozein lan onartzera darama eta
gainera bikotean tentsioak izan ditzake. Beraz, langabezia maskulinoan, langabezia
orokorra ezaugarritzen duten hiru elementuez gain, pertsonarteko harremana
agertzen da, bikotekidearekikoa hain zuzen. Langabezia femeninoa, bi itemekin
ezaugarritua agertzen da. Emakume langabetuak estutasuna, estresa sentitzen du eta
arazo ekonomikoak dauzka. Gainera edozein lan onartzea elementu ezaugarritsutzat
hartu ez bada ere, ikasleen ia erdiak karakteristikotzat jo duela kontutan hartu
beharra dago. Hiru kasuetan, langabezia orokorrean, maskulinoan eta femeninoan,
estutasuna, estresa sentitzea eta arazo ekonomikoak izatea elementu ezaugarritsuak
dira.
Errefusapen galdesortetan gizon langabetuaren kasuan, enpleguaren bilaketa
eta arazo ekonomikoak elementu zentraltzat jotzen dira. Bazterketa soziala, ordea, ez
da funtsezko elementutzat jotzen. Langabezia femeninoaren kasuan, enpleguaren
bilaketaren zentraltasuna soilik berretsi da. Hau da, gizon langabetua enplegua
bilatzen duen eta arazo ekonomikoak dauzkan gizona da, emakume langabetua
berriz, enplegua bilatzen duen emakumea da. Beraz, gizon langabetuaren eta
emakume langabetuaren artean elementu komuna enpleguaren bilaketa da.
Errefusapen galdesorten bidez lortutako informazio hau gogora-ekartzeko
galderetan lortutako informazioarekin erkatuz gero, argi dago lanaren dimentsioak
funtsezko papera betetzen duela. Analisi lexikografikoan adibidez, langabetua
enplegurik ez duen eta enplegua bilatzen duen pertsona da. Era berean, analisi
kategorialean lanarekiko harremana funtsezko dimentsioa da, bai langabezia
orokorrean, bai maskulinoan bai eta femeninoan ere. Arazo ekonomikoei helduz,
langabezia maskulinoaren kasuan, gogora-ekartzeko galderetan eta karakterizazioko
galdesortetan elementu garrantzitsutzat jotzen da, dimentsio ekonomikoaren pisua
langabeziaren irudikapenean agerian jarriz. Bestalde, langabezia femeninoan,
errefusapen galdesortetan arazo ekonomikoen zentraltasuna berretsi ez bada ere,