genero- asimetria langabeziaren irudikapen sozialean - Euskara

10
LANGABEZIA FEMENINOA ETA MASKULINOA: GENERO-ASIMETRIA …
funtzionamendu soziala du aztergaitzat. Izan ere, irudikapen sozialak, taldeek
partekaturiko eta egituraturiko eguneroko errealitatearen eraikuntzari esanahia
emateaz gain, sozialki sortutako eta sozialki barreiatutako ezagutza-moduak dira.
Irudikapen sozialak ezagutza praktiko eta sozialak dira, errealitatea
antzemateko, interpretatzeko eta berreraikitzeko (Elejabarrieta, 1991). Irudikapen
sozialen bidez, pentsamendu sozialaren eraikuntza-prozesuak aztertu daitezke eta
era berean, gizakiek edota taldeek munduarekiko duten ikuspegira hurbildu. Izan
ere, ezagutza arruntaren bidez, jendeak jokatu eta objektu sozial ezberdinen aurrean
kokatzen da. Irudikapen sozialen analisiak aldi berean psikologiko eta sozialak diren
fenomenoak azaltzera darama eta Moscovici-ren esanetan (1984), “begirada
psikosoziala” martxan jartzen du. Irudikapen sozialen teoriak ikuspuntu
psikosoziologiko berria ezartzen du, gertaera sozialen ezagutzan, izaeran, jatorrian
eta gizabanakoengan, taldeengan eta testuinguru sozialean dituen ondorioen
azterketarako (Valencia eta Elejabarrieta, 2007). Irudikapen sozialen teoria gizarte
modernoetako gertaera psikosozialak ikasteko kontzeptu eta ideien marko
psikosozial gisa hartu daiteke. Teoria honi jarraiki, gertaera eta prozesu
psikosozialak modu egokian ulertzeko, egoera historikoetan, kulturaletan eta makro-
sozialetan barneraturik aztertu behar dira. Marko teoriko honetan, gaur egungo
psikologia sozialean nagusi diren teoria eta fokapenen hutsuneak gainditu nahi dira,
izan ere, teoria horiek indibidualismo metodologikoan eta funtzionalki subjektua eta
objektua bereizten dituen epistemologia batean oinarritzen dira (Valencia eta
Elejabarrieta, 2007).
Irudikapen sozialen teorian sakontzeko helburuarekin, hurrengo orrialdeetan
lehenik eta behin Moscovici-ren teoriak izandako eragin teorikoei helduko zaie,
ondoren Moscovici-k proposatutako eredu triadikoaren oinarriak azaltzeko.