genero- asimetria langabeziaren irudikapen sozialean - Euskara

64
LANGABEZIA FEMENINOA ETA MASKULINOA: GENERO-ASIMETRIA …
bat enplegu, inaktibitate eta langabeziaren arteko erdibidean dagoelako ematen da.
Maruani-k (2002) multzo hauek gero eta feminizatuagoak daudela gaineratzen du
eta, beraz, sozialki onargarriagoak direla. Era berean, emakumeek langabezian duten
gain-presentzia azaltzeko, Torns-ek (1995) tolerantzia sozialaz hitz egiten du.
Tolerantzia sozial hau nonahi aurkitu daiteke, irudikapen sozialetik, emakumeen
lan-bideratze politiketaraino. Autore honen ustez, lan femeninoaren berezitasunak
aztertzerakoan, sistema sozioekonomikoaren oinarrian dauden jarduera
produktiboaren eta ugalketa-jardueraren arteko interdependentzia kontutan hartu
beharra dago. Gainera, interdependentzia hau berdintasunezkoa ez dela
azpimarratzen du, lan produktiboa ekonomikoki eta sozialki baloratua da baina,
ugalketara bideratutako jarduerak baliogabeturik daude. Bestalde, gaineratu beharra
dago, generoaren eraikuntza soziala gizonezkoek produkziorako duten orientazioan
eta emakumezkoek ugalketa-jarduerenganako duten orientazioan oinarritzen dela
(Poal, 1993; Vouillot eta kol., 2004). Torns-ek (1995), emakume gazteek bereziki izaten
dituzten langabezia tasa-altuak azaltzerako orduan, tolerantzia sozialaren eragina
azpimarratzen du. Gizarteak emakume gazteak etorkizuneko ama eta emazte gisa
hautematen ditu eta ez langabetu gisa. Era berean, gizon gazteekiko langabeziaren
aurrean larritasuna nabarmena da, gazte hauek etorkizuneko familia-buru moduan
hautematen baitira.
4. EGUNGO GAZTEAK ETA LANGABEZIA: FRANTZIA
ETA ESPAINIAKO EGOERA
Giza eskubideak goraipatzen dituen kultura batetan, enplegu
estrukturalaren gabezia ez dagokie langabetuei soilik. Eskubide-Estatuarentzat
seinale gorria da, Ongizate Estatuaren krisialdiaren sintoma. Gaur egungo gizarte
industrializatuetan ematen diren tentsio, kontraesan, gatazka eta aldaketen isla da.
Langabezia, eztabaida ideologikoan, puntu kritikoa da eta sistema politikoentzako
oinarrizko lehia (Blanch, 1990). Langabezia gaur egungo arazo sozial eta ekonomiko
larrienetarikoa dugu eta, dirudienez, ikuspuntu honekin bat datoz, politiko, aditu eta
hiritarrak (Agulló, 2001). Ildo honetan koka daitezke maila instituzionalean hainbat
erakundek langabeziaren aurrean egindako gomendio eta ohartarazpenak.