genero- asimetria langabeziaren irudikapen sozialean - Euskara

38
LANGABEZIA FEMENINOA ETA MASKULINOA: GENERO-ASIMETRIA …
testuinguruaren funtsezko papera nabarmendu da eta hiru orientazio modu azaldu
dira: irudikapenek praktikak mugatzen dituztenean, elkarren arteko interakzioa
ematen denean eta praktikek irudikapena eraldatzen dutenean. Azken orientazio
honetan, jazotako egoera berria itzulezintzat jotzen denean hiru eraldaketa mota
azaldu dira. Lehena, eraldaketa progresiboa, praktika berriak irudikapenarekin
kontraesanean ez datozenean; bigarrena, eraldaketa erresistentea, praktika berriak
irudikapenarekin kontraesanean daudenean eta defentsa-mekanismoak martxan
jartzen direnean; eta hirugarrena, eraldaketa bortitza, praktika berriak
irudikapenarekin kontraesanean daudenean eta defentsa-mekanismoak martxan
jartzeko edota jarraitzeko aukerarik ez dutenean.
Eraldaketa prozesuetan irudikapen sozialen eta praktika sozialen arteko
harremana ikusi ondoren, irudikapen sozialak gidatzen dituzten sistema
arauemaileen azterketan sakonduko da eta, bereziki, erreferentzia taldeen analisiari
helduko zaio. Hain zuzen ere, sistema arauemailearen azterketa proposatuko da
gizabanakoen pentsamendua gidatzen duten oinarri ideologikoetan sakontzearren.
3.2. SISTEMA ARAUEMAILEA ETA ERREFERENTZIA
TALDEAK
Irudikapen sozialak zuzentzen dituzten sistema arauemaileak aztertu eta
bereziki erreferentzia taldeen inguruan sakondu aurretik, arau sozial kontzeptuari
buruzko zenbait zehaztapen egitea komeni da. Fischer-en arabera araua honela
definitu daiteke: “une règle explicite ou implicite qui impose de façon plus ou moins
prégnante un mode organisé de conduite sociale; elle se présente comme un
ensemble de valeurs largement dominant et suivi dans une société donnée; elle
sollicite d´interactions complexes” (Fischer, 1987, 60-61 orr.). Mucchielli-k (1999)
bizitza soziala arauen bidez antolatuta dagoela dio, hala ere, arau hauek maila
hertsakor desberdina dutela azpimarratzen du. Gizabanakoen portaerak arauzko
orden sozialaren arabera ematen dira, baina era berean, erabaki indibidualen gisara
eraikitzen dira. Hau da, jokaera-modu ezberdinak daude bizi garen gizartearen
arauekin bat datozenak.