genero- asimetria langabeziaren irudikapen sozialean - Euskara

III. HURBILPEN METODOLOGIKOA
1. Sarrera
Behin ikerketa helburuak eta hipotesiak azalduta, langabeziaren irudikapen
sozialaren edukiaz eta egituraz jabetzeko erabilitako metodoetan murgilduko gara.
Izan ere, metodologia baten aukeraketa, arrazoi enpirikoengatik (ikas objektuaren
izaera, populazio mota, egoeraren ezaugarriak, etab.) mugatua badago ere, mugaketa
honen funtsezko eragilea, gure kasuan, ikerketa bermatzen eta justifikatzen duen
sistema teorikoa dugu, Gune Zentralaren Teoria (GZT) hain zuzen.
Lehenik, aukeratutako teknikak eta datu azterketetarako erabilitako
irizpideak azalduko dira. Hain zuzen ere, irudikapenaren edukiaz jabetzeko, galdera
irekiak erabili dira, gogora-ekartzeko galderak. Egitura aztertzeko, karakterizazioko
galdesortez baliatu gara eta gune zentrala osatzen duten elementuen
zentraltasunaren konfirmaziorako, errefusapen galdesortak planteatu dira. Era
berean, sistema arauemailearen azterketarako ordezkapen teknika erabili da, ikasleei
beren iritziez gain (erantzun estandarrak) erreferenteen lekuan jarrita erantzutea
eskatu zitzaielarik. Ondoren, ikerketan jarraitutako prozedurak eta partehartzaileak
zehaztuko dira eta azkenik, erabilitako lanabesa aurkeztuko da.
2. ERABILITAKO TEKNIKAK ETA DATU AZTERKETA
GZT arabera, irudikapen sozial batenganako hurbilpenak, bere edukiaren
inguruko ikerketa eta eduki horren egituraren azterketa behar du. Beraz,
beharrezkoa da edukia ezagutu, elementuen arteko harremanak aztertu eta gune
zentralaren determinazioa eta kontrola zehaztu (Abric, 1994d).
Irudikapen sozialen hurbilpenerako teknika nagusietako bat elkarrizketa da,
erdi-egituratua (Abric, 1996b) edo eta askea (Moscovoci, 1961/1976) izan daitekeena.
Era berean, irudikapen sozialen azterketarako, galdesorta oso teknika erabilia da.
Galdesortak edukiaren azterketa kuantitatiboa egitea ahalbidetzen du eta bere