genero- asimetria langabeziaren irudikapen sozialean - Euskara

HURBILPEN TEORIKOA
Objektu sozial baten inguruan, talde sozial batek duen irudikapen sozialaren
muina, gune zentrala, partekatua eta egonkorra da. Testuinguruaren ezaugarri
nagusia, ordea, aldaketa da. Egitura egonkor honek, beraz, ezin izango luke egoki
funtzionatu bere inguruan antolatzen diren azalaldeko elementuak aintzat hartu
gabe. Berez, azalaldeko elementu hauei esker irudikapenean barneratu eta
maneiatzen baitira, errealitate konkretuaren eta bizipen pertsonaleko gertaerak.
2.4.1.1. Azalaldeko elementuak
Azalaldeko elementuak gune zentralaren inguruan eta berarekiko
harremanean antolatzen dira. Azalaldeko elementuak, malgutasun handiagoa dute
eta testuinguruarekiko sentikorragoak dira. Azalaldeko elementuek taldeak eta
gizabanakoak egoera zehatzetara egokitzea ahalbidetzen dute, gizabanakoen
esperientziak barneratzearekin batera (Wagner eta Elejabarrieta, 1994).
Azalaldeko elementuek hiru oinarrizko funtzio betetzen dute: zehaztapen
funtzioa, funtzio erregulatzailea eta defentsa funtzioa.
• Zehaztapen funtzioa: Azalaldeko elementuek irudikapena berehala
ulergarriak diren termino zehatzekin janzten dute. Irudikapena
azalerazten den egoeraren ezaugarriak barneratzen dituzte eta
gizabanakoen oraina eta bizipena adierazten dute.
• Funtzio erregulatzailea: Azalaldeko elementuak gune zentraleko
elementuak baino malguagoak dira eta irudikapen soziala
testuinguruaren garapenei egokitzeko papera betetzen dute.
Irudikapenaren alderdi dinamiko eta ebolutiboena osatzen dute.
• Defentsa funtzioa: Irudikapenaren gune zentralak aldaketarako
erresistentzia handia du, bere aldaketak irudikapen osoaren eraldaketa
ekarriko bailuke. Honela, azalaldeko elementuek irudikapenaren
defentsa-sistema moduan funtzionatzen dute, bertan kontraesanak
agertu eta barneratuko direlarik.
Hala ere, azpimarratu beharra dago bi osagai hauek, elementu zentralak eta
azalaldeko elementuak, entitate osotu bezala funtzionatzen dutela. Abric-en hitzetan
23