genero- asimetria langabeziaren irudikapen sozialean - Euskara

282
LANGABEZIA FEMENINOA ETA MASKULINOA: GENERO-ASIMETRIA …
bestetik, lanak generoaren araberako desberdintze-prozesuetan jokatzen duen
paperari heltzeko. Lanaren zentraltasunari dagokionez, Verquerre, Masclet eta
Durand-en (1999) ikerketan Frantziako batxilergo ikasleentzako lanak duen
zentraltasuna aztertzerakoan argi ikusten zen gazteentzako lanak duen garrantzia.
Hala ere, gazteek lanerako duten motibazioa hein handi batean langabeziarekiko
beldurrak baldintzatuko luke. Autoreek, lanaren instrumentalitatea azpimarratzen
den neurrian, lana sakratutzat jotzen ez dela ondorioztatzen dute. Hau da,
gazteentzako lana baliabide bat da eta ez berezko helburua.
Bestalde, generoen araberako lanaren banaketari helduz, lan ordainduarekiko
–lanpostua- eta lan ez ordainduarekiko -etxeko lana bereziki- hurbilpena egiteaz
gain, bi espazio hauen arteko harremana kontutan hartzea beharrezkoa da. Izan ere,
lanerako orientazioan egiten den generoaren araberako banaketan oraindik ere
feminitatearen eta maskulinitatearen eredu sozialak ezkutatzen baitira (Poal, 1993;
Vouillot eta kol. 2004), eta eredu hauek sozialki baloratutako eta legitimatutako
preskripzio moduan funtzionatzen dute. Gainera, sistema sozioekonomikoaren
oinarrian dauden jarduera produktiboaren eta ugalketa-jardueren arteko
interdependentzia berdintasunezkoa ez dela kontutan hartu beharra dago, bata,
sozialki baloratua den bitartean, bestea, baliogabetua aurkitzen baita (Torns, 1995).
Langabeziaren edukiari dagokionean, gune zentrala osatzen duten
elementuen identifikazioan aurrera egiteko zenbait proposamen egin ditzakegu.
Gure ikerketan lortutako datuen arabera, estutasuna langabeziaren ezaugarri
nagusienetakoa da. Hala ere, elementu honekiko errefusapen galdesorta planteatu ez
zenez, elementu honen zentraltasuna konfirmatzeke geratu da. Era berean,
estutasunaz gain, beste bi elementuren inguruko azterketan sakontzea argigarria
izan daiteke genero-asimetriaren eraginak nabarmentzeko. Batetik, “norbere burua
zalantzan jarri” itemari helduz, langabetuaren identitatean -emakume langabetuan
eta gizon langabetuan- enpleguak betetzen duen lekura hurbildu gaitezke eta
bestetik, “edozein lan onartu” itemaren inguruko azterketak langabezian egoteak
sozialki suposatzen dituen eginkizunetan kokatzen gaitu. Hau da, enpleguaren
bilakuntza derrigorrezko baldintza bihurtuta bai maila instituzionalean baita
sozialean ere, langabetuen betebeharretan sakontzeko aukera izan daiteke.