san carlo parte iniziale volume 5 valletrompia.qxd - Brixia Sacra

BRIXIA SACRA
anni qua dies breviores sunt vesperae diebus festis dimidia hora deferri
poterint ut doctrina christiana eo tempore longiuscule exerceri possit.
Virginum Sanctae Ursulae et viduarum Sanctae Annae archipresbiter pro
temporibus quam diligenter curam habeat et in ministrandis sacramentis et
excitare in eis studium non solum ad retinendum, sed ad augendum in dies
magis vitae spiritualis ac christianae pietatis et charitatis propositum sollicitus
sit. Confessores omnes tam regulares quam seculares, peracta egroto
administratione sacramenti poenitentiae, manu testimonium statim scriptum
eidem tradat medico exhibendum sub poena regularibus suspensionis
ab audiendis confessionibus ad arbitrium reverendissimi episcopi, sacerdotibus
vero secularibus scutorum decem auri fabricae ecclesiae applicandorum.
Cum usu compertum sit in loco Salodii et aliis totius Riperiae locis ob olei
et piscium commoditatem abundantiamve quadragesimae diebus vigiliis et
quatuor temporibus laticinia, butyrum et alios eo tempore vetitis cibos non
permitti curet ordinarius etiam per vicarios foraneos ne hoc sanctissimum
ecclesiae institutum preceptumve contraria consuetutidine usuve tollatur
praetextu etiam generalis consuetudinis huius dioecesis totiusve provinciae
Mediolanensis sed in posterum [f. 966r] illi qui eo tempore cibis praedictis
vesci audebunt, poenis ad prescriptum sacrorum canonum reprimantur nec
predicta illis diebus vendi permittatur sub poena etiam interdicti ab ingressu
ecclesiae et aliis arbitrio eiusdem ordinarii. Hoc vero decretum inviolabiliter
observari decernitur in omnibus locis et terris Riperiae sub eisdem poenis.
Vicarius foraneus pro tempore in loco Salodii maiorem adhibeat diligentiam
in festorum observatione ac contra eorum violatores ad praescriptum
canonum et conciliorum, etiam provincialium severe procedat. Caveat
vicarius foraneus in suo vicariatu ut sacerdotes in missis primis ab illis
importunis et a sacris conciliis damnatis eleemosynarum exactionibus
abstineant, item a conviviis, ludis, spectaculis et inanibus oblectamentis ab
aliis item quae hominum ecclesiasticorum dignitati aliena sunt. Idem servetur
in festis propriarum ecclesiarum praeter ea omnia quae in ipsis festis
servanda provincialia concilia statuerunt. Nundinae ne deinceps fiant diebus
festis ad praescriptum constitutionum summorum pontificum et conciliorum
provincialium sed illas reici possint in diem praecedentem seu
subsequentem simili festo non impeditum. Tabelliones notariive non conficiant
instrumenta neque processus fabricent diebus festis conficiantve
contra praescriptum sacrorum canonum et conciliorum provincialium.
312