1896-1898 Tome 18 - Ouvrages anciens sur Saint-Omer (Pas-de ...

CXGVI
que les aultres princes et potentatz estans, des
mesme voulloir et oppinion, se puissent joindre
avecques nous et regarder par mutuel consentement
quelle ayde et secours chacun d'eux pourra faire en
son endroict, affin de pourveoir et donner ordre
aux parties et confins d'icelle chrestienté plus prochaines
du danger et évident péril d'iceluy Turcq,
au cas qu'il voulsist poursuyvre plus oultre l'entreprise
par luy encommencée, ou par cy après en
attempter ou innover une aultre nouvelle sur icelle
chrestienté, nous avons trouvé bon et trop plus que
requiz et nécessaire de nous assembler, en intention
de traicter d'aulcuns articles, touchans etconcernans
la conservation et défense d'icelle chrestienté, pour
après iceux estre notifiez aux princes et potentatz
d'icelle chrestienté, que nous verrons et congnoistrons
que besoingsera et l'affaire le requérir. Et encores
que le principal fondement et la cause de nostre
dicte assemblée ayt esté et soit, comme dict est,
pour pourveoir et donner ordre de nostre part à
l'évident péril et danger où estoit pour tomber
ladicte chrestienté, et que pour les advertissemens
que dempuis icelle assemblée avons eu de la
retraicte d'iceluy Turcq, dont nous devons tous rendre
grâces et louange éternelle à Dieu, nostre créateur,
il sembleroit qu'il ne fust pas à présent grand
besoing que de y donner aultre provision, toutesfoiz,
pour ce qu'il pourroit estre que iceluy Turcq, encores
qu'il se soit aulcunement eslongné, l'auroit faict
sur quelque nouveau dessaing, ou seroit pour une
aultre foiz revenir sur icelle chrestienté, ne voulans
perdre l'occasion pour laquelle nous nous sommes