1896-1898 Tome 18 - Ouvrages anciens sur Saint-Omer (Pas-de ...

CCLXIX
que véritablement (ainsy que sçavons que luy
mesmes bien le consydère) eu esgard au bas lieu,
sang et maison dont est extraicte ladicte niepce du
Pape, le très-noble et très-illustre sang, progenie et
maison royal de France, nostre très-cher et très-amé
cousin et filleul, le duc d'Orléans, ledict mariage
seroit fort dispar et inequal. Par quoy ne sommes
aulchunement d'advis qu'il soit conclut, si n'estoit
que, par ce moyen, nostredict bon frère eust quelque
grand profit, commodité et avantage qui redundast
au bien, utilité et honneur, tant de luy que de nous,
et qu'à ces fins, le Pape fist et accordast chose qui
contrevaulderoit et recompenseroit le default de si
bonne lignée et parentage, ce que ne luy seroit possible,
au moins très-difficile, comme il nous semble.
Toutesfoiz, si nostredict bon frère agnoist ou peult
pense[r] aulcune telle condigne valeur ou recompense,
ce qu'il pourra à l'avanture, mieux que nous
ne ferions, nous en rapportons bien à luy. Que si telle
chose luy vient à cognoissance, et qu'il luy plaist,
comme bien sçavons qu'il le fera, nous en advertir
plainement, il nous trouvera très-prestz et promptz
non seullement de lui en mander nostre advis ouvertement,
comme nostre amytié requiert, mais aussy
à nous employer, si c'est son profit, commodité ou
plaisir, à tout ce qui pourra et semblera expédient,
à avancer et poulser oultre ce que par luy et nous
sera advisé, commodieux et expédient. Et de ce soy
peut il fier en nous asseurement.... »