1896-1898 Tome 18 - Ouvrages anciens sur Saint-Omer (Pas-de ...

CCCXXXIV
vous m'en advertirez incontinant et je le feray. Et
luy direz davantage de par moy, qu'il me semble
que, pour propoz que ayt tenu Nostredict Sainct
Père à icelluy cardinal de Tournon, il ne se doibt
aigrir envers Sadicte Saincteté, ne la désespérer,
ains, au contraire, monstrer qu'il espère sur toutes
choses, que, à la veue qui se fera de brief de icelle
Sa Saincteté et de moy, son dict affaire soit vuydé
et deciddé par quelque bon et honneste moyen,
remettant entièrement cela sur moy. Et à ladicte
veue, j'espère m'employer pour la décision de
sondict affaire, tant envers Nostredict Sainct Père,
que partout ailleurs, où besoing sera, que Monsieur
de Norrtfolc et les autres personnaiges qui se y
trouveront, de la part d'icelluy mon bon frère,
congnoistront par effect et toucheront au doyt de
combien j'ay sondict affaire à cueur, et de quelle
sorte je m'employeray pour luy en faire avoir
l'issue, telle qu'il désire.
Au demourant, Monsieur le Bailly, vous aurez
aussi veue ce que je vous escripviz dernièrement
touchant le personnage que Notre Saint Père avoit
envoyé devers moy et devers icelluy mon bon frère,
pour le faict du concilie, et le double des articles
qu'il m'avoit baillez. Lesquelz je vous envoyay, dès
l'heure mesmes, et ne fayz nulle difficulté que
vous ne les ayez communiquez à mondict bon frère.
Vous advisant que depuys j'ai pensé à la responce
qu'il me semble que luy et moy devons faire sur le
faict d'icelluy concilie. Et pour conclusion, je suis
d'advis que mondict bon frère doibt dire à icelluy
personnage, que, attendu que le fait d'icelluy con-