1896-1898 Tome 18 - Ouvrages anciens sur Saint-Omer (Pas-de ...

CCXCV
autres. Et eulx deux ensemble, avec leurs amytiés
ouvertes et secrètes qu'ilz ont, pourraient faire ung
tel effort qu'il seroit bien difficile d'y résister ; et ou
lieu de la paix qui est de présent en la chrestienté, se
pourrait causer une guerre plus grande que celle qui
a heu lieu par le passé.
Semblablement, pourront, par manière d'avis,
remonstrer iceulx sieurs Gardinaulx à Sadicte Saincteté
que là, où elle se vouldroit trouver à Nice ou en
Avignon, ainsi qu'autresfois elle a fait porter parolles
au Roy très chrestien, par ledict sieur Cardinal
de Gramont, de vouloir faire, après que iceluy Empereur
seroit party 'de l'Ytalie, en ce cas ledict Seigneur,
suyvant sa promesse, se y trouvera, et oultre
cela porchassera envers ledict Seigneur Roy d'Angleterre,
son bon frère, de se y vouloir trouver de sa
part, en laquelle veue se pourrait rabiller toutes
choses par quelque bon et honneste moyen. Et seroit
bon que l'Assemblée dessusdicte fust faicte, avant
que les Ambassadeurs, par lesquelz lesdicts sieurs
Roys veullent faire demander les réparations des
choses dessusdictes, feussent depeschez.
Et généralement feront lesdicts sieurs Cardinaulx,
en toutes et chacunes les choses dessusdictes, tout
ce qu'ilz verront estre à faire pour le mieulx et se
conduyront et gouverneront, ainsi qu'ilz trouveront
les choses disposées, et surtout s'employeront envers
Nostredict Sainct Père, et ailleurs où besoing sera, en
tout ce qni touchera le faict dudict Seigneur Roy
d'Angleterre, tout ainsi et en la propre forme et
manière qu'ilz vouldroient faire, pour l'affaire propre
du Roy, sans en cela perdre heure ne temps.