1896-1898 Tome 18 - Ouvrages anciens sur Saint-Omer (Pas-de ...

CCCXCVI
paux autheurs de le proposer, lors qu'il estoit question
du mariage d'Escosse à la niepce de nostre
Sainct Père, et que, encores qu'au dict commancement,
ce ne fust par aventure l'intention arrestée de
l'un ny de l'autre desdicts Roys, d'amener les choses
jusques à exécution, toutesfois fut advisé entre eux
dernièrement à Calais qu'il y seroit procédé sans
feintise, mesmement là, où Sa Saincteté voudroit
venir par deçà, tellement que la chose fut si avant
conclue et arrestée qu'à cette heure ledict Seigneur
ne pouvoit de moins que la parachever et consommer,
s'il ne vouloit estre estimé Prince sans foy. Et
luy semble bien que qui l'en auroit voulu retirer,
estans desjà les choses si avant, et où tant y alloit de
sa parolle et de son honneur, auroit faict trop bon
marché de la foy et honneur dudict Seigneur, de
laquelle foy, honneur et conscience il faict tant de
compte et d'estime, qu'il ne voudroit, pour tous les
biens de ce monde, y tourner ny changer propos ou
volonté. De toutes autres choses qui ne toucheront
que la vie, elles demeureront tousjours prestes à
exposer pour ses amis, principallement pour ceux
qui luy seront tant imprimez dedans le coeur par
amitié qu'est le Roy son bon frère. Et pour ce, que
d'huy en avant sondict frère advise bien, et pense
meurement, devant que de le faire entrer en un
chemin, où il y aille de sondict honneur; car autant
lui seroit difficille d'en sortir et de s'en retirer, et
n'est chose qu'il voulust faire pour personne du
monde.
Item luy sera ramené en mémoire combien ledict
Seigneur a pensé faire pour luy de faire venir par