Azalpenezko testu entziklopedikoaren azterketa eta ... - Euskara

“[...] La notion de texte singulier ou empirique dèsigne donc une unité concrète
de production verbale, qui relève nécessairement d´un genre, qui est composée de
plusiers types de discours, et qui porte également les traces des décisions prises par le
producteur individuel en fonction de la situation de communication particulière qui est
la sienne.” (Bronckart, 1996, 79.or)
2.2. Testuen ekoizpenerako eredu baten osagaiak
Eman den testu definiziotik abiatuz, testu ekoizpenerako eredu orok
honako bi baldintzak bete behar ditu: testua eta hizkuntz ekintzaren arteko
erlazioaren problematika integratu egin behar ditu eta ekoiztutako testuen
analisi mailak bistarazi eta hierarkizatzeko modua ahalbideratu behar du.
2.2.1. Testu enpirikoaren ekoizpenerako baldintzak
Testu enpirikoa ekoizteko zer nolako eragiketak egin behar diren
eta, halaber, eragiketa horiek zein mailatakoak diren aztertuko dugu.
Esandako guztiagatik, testu enpiriko oro (berbazko ekoizpen unitatearen ale
bakana) honako bi elementuen elkarrekintzatik sortutako ekoizpena da:
hizkuntz ekintza baten eta genero historiko jakin baten (testu-genero edo
testu mota) elkarrekintzatik. Edo bestera esanda, honako bi faktoreen
elkarrekintzatik sortutako ekoizpena dugu testu enpirikoa: ekintza egoeraz
egileak egindako errepresentazioa –intentzioak, helburuak, transmititzeko
eduki tematikoa, etab.– eta halaber, horrek hizkuntzan –intertestuan–
erabilgarri dauden generoez egiten dituen errepresentazioak. Bronckart
(1996, 138.or) autoreak eginiko hipotesi honen alde gaude.
a)Testuaren ekoizpena. Testu ekoizpen oro hizkuntz ekintza batean
kokatuta dago eta hiztun batek gauzatutako berbazko portaeren hurrenkera
da.
Dakigunez, hizkuntz ekintza guztien emaitza testua da. Ekintza hori
egoera jakin batean gertatzen da. Eta egoera horrek hiru munduren eragina
batzen du: mundu fisiko, sozial eta indibidualarena.
Ekoizpenaren testuingurua definitzeko testu antolakuntzan eragiten
duten parametroak har daitezke. Bronckart-en (1996) esanetan, parametro
horiek posible diren guztien artetik, eragin nahikorik dutenak aukeratzen
dira (mekanikoak alde batera utzita). Faktore horiek bi multzotan biltzen
ditu teorilari honek: mundu fisikoari dagozkionak eta mundu sozial eta
subjetiboari dagozkienak.
Mundu fisikoari dagozkion parametroak hauexek ditugu:
99