Azalpenezko testu entziklopedikoaren azterketa eta ... - Euskara

369
Bukatzeko, ondoriozta dezakegu batetik, testu mota honetan gaiaren
aurkezpena eta berreskurapena, oro har, anafora nominalen bidez egiten
dela; eta, bestetik, kate anaforikoak luzera ezberdinetakoak ditugula,
luzeenak, mintzagaiaren nozioa edo lehengaiaren nozioa bideratzen duela
gehienetan, eta beste kateak, oro har, lehengaiarekin edo azpi-sail baten
nozioak bideratzen dituztela. Beraz, kate anaforiko gehienak gaiaren,
fabrikazio urratsen eta lehengaien bueltan osatzen dira. Hori dela eta, kate
anaforikoak, lerrozko antolatzaileekin batera (lehendabizi, gero,
ondoren,...), ulermenaren elementu bideratzaile garrantzizkoenak direla
esango dugu.
Izen kohesioak testu antolaketarekin dituen harremanei dagokienez,
sakon aztertu ez bada ere, ikusitako ezaugarrien arabera honako joerak
ikusi ditugu:
1. Kate anaforikoek faseen artean dauden nozioen loturak ziurta
ditzakete.
2. Kate anaforikoen gurutzamenduak testu fase barnean gertatzen
dira. Horrekin esan nahi dugu testu fase bakoitzaren barnean
ematen direla kate paralelo gehienak.
3. Konexio eta kohesio mekanismoak gainezarririk ager daitezke
hizkuntza unitate beraren gainean.
4.2. Ikasleen ekoizpenetan ikusi diren kate anaforikoak
Ikasleen testuetan aurkitu ditugun lotura guztiak ez dira erabat
lortutakoak. Idazmenaren ikaste prozesuan dauden ikasleak diren heinean,
testua kohesionatzeko hainbat saiakera ez dira erabat lortuak, aurreko
kapituluan ikusi dugun moduan; halere, interesgarri deritzogu, lortutako
loturez gain, ahaleginak ere jasotzea –horiek baitira ikaskuntza prozesuaren
adierazgarri–, eta horrela egingo dugu.
Espero genuen bezala, ikasleen testuak anitzak dira. Aniztasun hori
guztia ezin erakutsi eta, (13-B2) testua aukeratu dugu analizatzeko.
Testu kanonikoekin egin dugun bezala, hemen ere atalez atal dauden
kate anaforikoak aztertuko ditugu.