Azalpenezko testu entziklopedikoaren azterketa eta ... - Euskara

Testuen ezaugarri nagusiak:
1. Testuen luzera
Testuaren luzerak, bera bakarrik hartuta, ez du adierazten testuak
ekoizteko aparteko gaitasunik. Halere, hemen, besteak beste, anaforen
dentsitatea kalkulatzeko atera da datu hau. Adierazgarriak dira, bestalde,
zenbait ikerketetan aditzera emandako datuak: nagusiek ikasle gazteek
baino ekoizpen luzeagoak egiten zituzten (De Weck 1987; Apothéloz 1995,
besteak beste). Horrez gain, dagokigun testuan (azalpenezko testua)
garrantzi handia du informazioak (nola idatzi, zer idatzi ez badugu?). Hori
dela eta, SDkoaren tailer batean informazio motak landu dira. Ildo honetan,
aipagarri ikusten da ikasleek oroimenean gordeta eduki ditzaketen
ezagutzak eta bere kabuz erabili ahal dituztenak "kontserben" testua
ekoizteko, bideotik jaso duten informazioaren osagarri modura. Dakigunez,
ikasle guztiek jaso dute informazio berbera bideotik eta litekeena da, bertan
aipatu ez den informaziorik izatea eta erabiltzea. Arrazoi guzti horiek direla
medio, informazio kantitatearen bilakaera ere erakutsi nahi izan dugu gure
lan honetan (ikus 7.1.taula eta 7.1.grafikoa). Datu honek balio
estadistikorik ez badu ere, kuantifikatzeak beste datu bat ematen digu.
7.1.taula:
Hitz kopurua batez beste A eta B ekoizpenetan
Hitz kopurua batez beste Muturreko balioak
A1 117,45 74-204
A2 143,25 87-218
B1 113,8 74-202
B2 137,3 68-327
Talde esperimentaleko (A) 16 ekoizpenetan gehitu da hitz kopurua
aurretestutik ondotestura eta kontrol taldean (B) 15 ekoizpenetan. Hitz
kopuruari dagokionez, lehen begiradan ezberdintasun handirik ez dagoela
ematen du: A taldean 25,8 hitzetan gehitu da aurretestutik ondotestura eta
B taldean 23,5 hitzetan batez beste. Halere, 9B2 testuaren bilakaerari
erreparatzen badiogu (136 aurretestuan eta 327 ondotestuan), konturatuko
gara ezohiko bilakaera horrek desitxuratu egiten dituela B taldearen batez
besteko balioak.
290