volumen xxiii. - Archive ouverte UNIGE

707 SERMONS. 708
qu'il oublie et ensevelit toutes nos offenses par
lesquelles nous sommes coulpables devant luy. Si
ainsi est, il s'ensuit qu'il n'y a que mal-heur en
nous iusques à ce que Dieu nous ait pardonné: et
si nous sommes meschans, où sera nostre iustice?
Car Dieu ne peut pas hair ce qui est convenable
à sa nature, il est la fontaine de toute iustice: s'il
trouvoit en nous quelque bien, encores quelque
petit qu'il fust, il est certain qu'il l'accepteroit. Il
faut, donc conclure d'autant que nous sommes
malins, qu'il n'y a en nous qu'iniustice et iniquité
et tout mal-heur, que nous ne pouvons pas estre
bien-heureux que nous ne soyons aimez de Dieu.
Or s'il nous aime, il faut quant et quant qu'il nous
approuve: s'il nous approuve, il faut que nous
soyons iustes. Toutes ces choses-la sont principes
qui devoyent estre assez entendus. Mais encores
si nous faut-il cognoistre que. nous ne pouvons
estre bien-heureux sinon que Dieu nous aime: car
cependant qu'il nous sera ennemi, helas, quelle est
nostre condition? dont est-ce que depend nostre
félicité? C'est quand Dieu nous [pag. 148] reçoit
en son amour. Or maintenant regardons comment
il nous aime: il faut qu'il nous approuve, comme
i'ay dit, car il ne peut pas se renoncer soy-mesme.
Et s'il nous reiette et que nous luy soyons détestables,
comment sera-il reconcilié avec nous? Or
venons au moyen : car Dieu ne se peut transfigurer,
et si nous prétendons de le faire c'est en vain (dit
sainct Paul) : car il demourera tousiours semblable
à soy, et nous saura bien séparer avec tous nos
mensonges, et nous racler de son rang: comment
donc serons-nous approuvez de Dieu? Il faut que
nous soyons iustes. Or ceste iustice-la, quelle
est-elle? Ce n'est pas que nous l'ayons en nos
oeuvres, que nous puissions nous acquitter envers
luy, ni satisfaire à nostre devoir: il n'y a rien de
tout cela. Quoy donc? Il faut que Dieu nous pardonne
nos péchez, qu'il oublie nos iniquitez, qu'il
ne nous impute point nos offenses. Et non sans
cause David a usé de ces trois façons de parler:
car on penseroit que ce langage seroit superflu:
mais notamment il réitère cela, d'autant que ce
n'est point seulement un abysme que la condition
de l'homme en laquelle il naist, et en laquelle il
est plongé iusqu'à ce que Dieu l'en retire, mais
c'est l'abysme des abysmes: brief, c'est le profond
d'enfer. Il faut donc que Dieu besongne [pag. 149]
ici d'une façon singulière. Et voila pourquoy aussi
il adiouste puis après, Et en l'Esprit duquel il
n'y a point de fraude : car il faut que nous sentions
combien la miséricorde de Dieu nous est nécessaire,
d'autant que la grandeur de nos péchez est telle,
que c'est pour empunaisir et ciel et terre, et non
seulement pour provoquer nostre Dieu, mais les
Anges, la lune et le soleil et toutes les creatures
à rencontre de nous. Ainsi donc voila pourquoy
David magnifie tant la remission des péchez. Et
pour ceste cause mesme sainct Paul conclud que
voila où gist toute nostre iustice, c'est que nos
péchez nous soyent pardonnez. Et notons bien
aussi, comme i'ay desia touché, que David met en
l'Esprit duquel il n'y a point de fraude: car il
monstre que nous ne pouvons recevoir la remission
de nos péchez, combien qu'elle nous soit offerte
alors de Dieu, iusqu'à ce que nous soyons du tout
confus en nous mesmes, que nous soyons bien
resveillez, qu'il n'y ait point d'hypocrisie ne de
fiction qui nous face à croire ceci ou cela et qu'il
n'y ait nul desguisement, que nous ne soyons point
doubles, ni endormis en nostre non-chalance:i mais
que nous soyons comme povres gens damnez et
perdus, que le iugement de Dieu persecute, tellement
que nous ne sachions que faire, et que nous
soyons là comme si desia [pag. 150] nous voyons
la mort présente, comme si nous voyons la main
de Dieu armée pour exécuter la sentence de maiediction
qu'il prononce à l'encontre de nous. Voila
ce que nous avons à noter quant à ceste iustice
pour en avoir une bonne definition. Or voila aussi
pourquoy il est dit au quinzième chap, des Actes
quand sainct Paul traitte des ceremonies qu'il faut
que nous soyons iustifiez par nostre Seigneur Iesus
Christ de toutes les choses dont la Loy de Moyse
ne nous a peu iustifier. Ce mot ici emporte assez
longue queue: car il faut savoir pourquoy S. Paul
parle des ceremonies de la Loy notamment, quand
il dit: Que les oeuvres ne peuvent rien faire, ne
servir pour nous rendre agréables à Dieu. Les
Papistes et mesmes beaucoup de gens anciens qui
n'estoyent point exercez en l'Escriture, mais qui
estoyent comme à demy Philosophes, se sont amusez
à ce mot de la Loy, et ne pensent que S. Paul
ne combat point pour les oeuvres moralles qu'on
appelle, c'est à dire, qu'il ne veut pas nier que
nous soyons iustes devant Dieu, quand nous vivrons
chastement, sans faire tort à personne, que nous
vivrons en temperance, en sobriété et en toutes
autres vertus, ils estiment que S. Paul ne touche
point à cela et qu'il veut bien que toutes ces
oeuvres-la méritent salut en partie: mais ils entendent
que les ceremonies de la [pag. 151] Loy ne
pouvoyent profiter à iustifier. Or c'est une sottise
par trop lourde: car en premier lieu S. Paul ne
parle point tousiours des ceremonies de la Loy. Et
voila en quoy ils se sont trop inconsidérément
abusez: et qu'ainsi soit au passage du Pseau. que
ie viens d'alléguer, David a situé la beatitude de
l'homme en la seule remission des péchez sans
aucune ouvre; et ce mot-la d'oeuvres comprend en
soy toutes les vertus en general, lesquelles les
hommes se peuvent attribuer, et d'où ils prenent