volumen xxiii. - Archive ouverte UNIGE

759 SERMONS. 760
contraire à soy. Or est-il ainsi qu'il m'a declairé
que i'auroye semence en Isaac, et que de là devoit
venir le Sauveur du monde: il faut que ie retiene
cela. Or il m'est commandé à ceste heure de tuer
Isaac: il n'y a ordre, car il faut que ce que i'ay
desia receu tiene. Voila comme Abraham se fust
excusé,- tellement qu'il eust esté rebelle à Dieu
sous ombre de luy obéir. Mais que fait-il? Il
considère que Dieu est puissant pour accomplir ce
qu'il luy avoit promis touchant Isaac. Et voire,
mais quand il sera mort, que sera-ce? Ouy, comme
si Dieu [pag. 254] n'estoit point le Seigneur de la
mort. Voila donc le vray combat de la foy d'Abraham,
c'est que la mort se présente devant ses yeux:
et c'estoit pour le rendre confus, mais il eleve la
puissance de Dieu plus haut, et dit: Dieu surmontera
encores en cest endroit. Et comment? Or il
n'est pas question que l'homme soit ici iuge ni
arbitre, ne qu'il lasche la bride à son opinion, ne
qu'il mesure la puissance de Dieu: mais il faut
qu'il ferme les yeux, et qu'il se tiene là, pour dire:
Dieu besongnera en telle sorte qu'il faudra que i'y
soye estonné: mais maintenant ce n'est pas à moy
de m'enquerir pourquoy, ne comment il veut ainsi
besongner : il faut que ie soye comme lié : iusques
à ce que Dieu me declairé ce qui m'estoit auparavant
incognu. Et cela se verra tantost plus clairement
en ce mot que respond Abraham à son fils:
Mon fils, Dieu y pourvoira. Nous voyons donc
maintenant comme nous avons à honorer Dieu,
quand il est question d'accepter ses promesses, et
de nous y tenir, et de faire une bonne resolution
de suivre par tout où il nous appelé: c'est assavoir,
que nous sachions que les issues de mort sont en
sa main, comme il est dit au Pseaume: Et quand
nous ne verrons que des Abysmes devant, qu'il
semblera qu'ils nous doyvent engouffrer: toutesfois
que nous marchions là où Dieu nous [pag. 255]
appelé. Or il dit notamment qu'Abraham a basté
son asne, qu'il a mis le bois dessus avec la provision,
et qu'il s'en est allé avec deux serviteurs
et son fils. Ici Moyse exprime plus spécialement
ce qui a esté touché ci-dessus, c'est assavoir, que
Dieu a examiné la foy d'Abraham iusques au bout,
quand il l'a ainsi tenu en suspen. C'estoit assez
qu'Abraham coupast le bois, et qu'il marchast seulement
quelque iect d'arc pour tuer son fils : mais
il faut qu'il se mette en chemin, ne sachant où il
doit aller, et puis la nuit vient qui apporte tousiours
avec soy plus de fascherie et de chagrin.
Quand nous avons desia quelque tristesse et quelque
sollicitude, il est certain que le mal se redouble
de nuit. Or il faut qu'Abraham en endure,
et qu'il soit agité de toutes parts. Et bien,
est-il levé le matin? c'est encores à recommencer.
Le iour il void son povre fils, lequel il
doit tuer puis après: et tousious ces fantasies
luy revienent au devant. Comment? que ie soye
murtrier de mon propre sang, et que devant Dieu
et devant les hommes ie commette un acte qui
pourroit estre le plus detestable qu'on pourroit.
penser? Car c'est une chose monstrueuse: et ceci
est pour faire dresser les cheveux en la teste do
tout le monde. Mais quoy qu'il en soit, si faut-il
qu'Abraham s'efforce tousiours et qu'il [pag. 256]
marche, et qu'il demeure la seconde nuict. iusques
au troisième iour que Dieu luy monstre la montagne
de Moria, qui est le lieu où depuis a esté
bastie Ierusalem. Voila donc ce que nous avons à
retenir, c'est assavoir, que pour bien combatre
contre toutes tentations, il ne faut pas seulement
que nous ayons quelque ardeur soudaine de foy:
mais une telle persévérance que nous ne défaillions
pas, combien que Dieu nous prolonge le combats et
que nous n'en ayons pas du premier coup la délivrance.
Et c'est un point bien nécessaire, car ceux
qui monstreront grande affection et singulière
d'obéir à Dieu, souventesfois n'auront que des
bouffées: et cela s'escoulera, comme nous l'expérimentons
par trop. Et ainsi ne trouvons point
estrange si Dieu ne nous délivre pas incontinent,
quand nous serons assaillis de quelque combat, et
que nostre foy doit estre esprouvee: si nous ne
surmontons pas du premier iour: mais qu'il faille
continuer, n'estimons pas que Dieu passe mesure,
ensuyvons plustost l'exemple de nostre père Abraham
en cest endroit. Or il est dit quant et quant,
qu'il a commandé à ses serviteurs de se tenir là,
qu'il a chargé son fils Isaac du bois pour faire le
sacrifice. Car il n'estoit pas question seulement
de tuer Isaac: mais il falloit qu'il le bruslast encores,
et qu'il mist le [pag. 257] corps en cendres.
Il charge donc Isaac de bois, et commande à ses
serviteurs de se tenir-là: car il void bien que ses
serviteurs n'eussent iamais permis un tel acte:
plustost ils eussent estimé: Voici un povre vieillard
radouté, il y a quelque furie qu'il a pris, il proteste
qu'il a commandement de Dieu, mais est-il
possible que Dieu ait commandé une chose si
cruelle? Ils n'eussent donc eu garde de iuger que
ceste obeissance-la eust esté un service de Dieu:
mais ils l'eussent tenu comme un homme enragé
et hors du sens. Abraham cognoit cela, et c'est
une circonstance que nous devons bien noter, c'est
assavoir, que puis qu'il a appréhendé l'infamie et
opprobre qui luy viendroit, et que chacun estimeroit
qu'il eust fait cela par frénésie, et que iamais Dieu
n'eust tenu pour agréable un tel service : puis, di-ie,
qu'il a appréhendé cela, et que neantmoins il ne
luy chaut de toute l'ignominie qui luy estoit apprestee
selon les hommes, en faisant une chose
qui estoit contre nature, et qui estoit une cruauté