volumen xxiii. - Archive ouverte UNIGE

727 SERMONS. 728
quand il est dit que Dieu nous reçoit à merci,
d'autant que nous sommes pécheurs: et puis quand
il nous a régénérez par son sainct Esprit, qu'il
approuve le bien qu'il a mis en nous, encores que
ce ne soit quasi rien au pris du mal qui y reste.
Quand donc nous parlerons ainsi, c'est autant
comme si nous disions qu'en premier lieu Dieu
nous est pitoyable, ne nous imputant point nos
fautes et péchez, et nous adoptant pour ses enfans,
nous qui estions perdus et damnez. Apres en second
lieu, qu'il iustifie aussi bien nos oeuvres, d'autant
qu'il use de miséricorde, qu'il ne veut point
iuger à la rigueur, et qu'il ne regarde point quelles
elles sont pour estimer leur mérite ou dignité.
Mais il en use comme Père. Cela, di-ie, n'a nulle
repugnance. Et ainsi combien que nostre Seigneur
Iesus Christ proteste qu'il soit venu pour appeler
les pécheurs, et non pas les iustes, combien que
sainct Paul die qu'il soit venu pour appeler les
pécheurs à salut, et que ce n'est point selon les
oeuvres que nous avons faites que l'héritage des
cieux nous est appresté, mais d'autant que Dieu
nous est humain, d'autant qu'il a voulu desployer
sa bonté infinie envers nous: toutesfois si est-ce
que nous ne laissons pas de recevoir salaire: c'est
à dire, quand nous aurons servi à Dieu, nous serons
rémunérez, comme tant souvent [pag. 190] l'Escriture
en parle. Or en ceste sorte ces deux passages qui
sembleront estre repugn ans n'ont nulle contrariété,
c'est que la iustice nous est réputée par la foy, et
que la iustice à esté réputée à Phinees pour le
zèle qu'il a eu de maintenir l'honneur de Dieu et
de purger le sanctuaire de la polution on laquelle
il estoit. Voila Phinees le sacrificateur qui voit
un acte si infame et si detestable que rien plus,
quand une paillarde est introduite au sanctuaire
pour commettre là une vilainie qui ne se devoit
ouir en Israel. Or Dieu l'arme tellement qu'il fait
execution des deux: et il est dit que cela luy est
réputé à. iustice. Or c'estoit une oeuvre de vertu:
il sembleroit donc qu'il n'est point iustifie par la
foy, mais comme i'ay dit, ceci se peut bien assembler.
Car Phinees a esté Fils d'Abram, il a donc
fallu que Dieu l'ait receu à merci comme les autres.
Mais d'autant que Dieu luy avoit secouru, et d'autant
qu'il s'estoit réconcilié à luy en la grace
qu'il donnoit à tous ses eleus, mesmes sous l'ancien
testament, voila comme cest oeuvre est tenu pour
iuste devant Dieu. Et pourquoy? D'autant qu'il
y avoit encores de l'imperfection et débilité, il
falloit que Dieu le supportast comme i'ay desia dit.
Ainsi revenons à ce que dit S. Paul au premier
chap, des Colos. c'est que nous travaillions vertueusement
pour servir à Dieu [pag. 191] à cause de
l'Espérance, laquelle nous est réservée au ciel, voire
de laquelle nous avons tesmoignage en l'Evangile.
S. Paul monstre là quand les fidèles prenent courage
de s'avancer avec plus grande vehemence et
désir pour servir et honorer Dieu: que voila comme
ils s'employent à charité: voire d'autant qu'ils savent
bien que leur peine ne sera point perdue, ainsi
qu'il en est parlé en l'Epistre aux Hebr. Or comment
le savent-ils? Par le tesmoignage de l'Evangile.
Et en l'Evangile qu'est-ce qui y est dit?
Que Dieu nous sera propice, d'autant que nous
croyrons à son Fils unique. Car la iustice qui
nous est là offerte, dit sainct Paul, a bien tesmoignage
de la Loy: mais elle n'est pas aidée de
la Loy, c'est à dire, par toutes les oeuvres que
nous saurions faire. Mais c'est d'autant que nous
sommes fondez sur la grace de nostre Seigneur
Iesus Christ. Ce passage-la donc, nous monstre
comme les fidèles se peuvent disposer beaucoup
mieux et plus ardemment pour servir Dieu, d'autant
qu'ils savent que leur labeur sera prisé. Et
cependant toutesfois ils ne laissent pas de se reposer
en ceste bonté gratuite qui leur est promise, d'autant
qu'ils ont leur refuge à nostre Seigneur Iesus
Christ. Et voila comme les Papistes s'abusent trop
lourdement. Car de ce mot de Salaire, ils tirent
le mot de Mérite [pag. 192], comme s'ils vouloyent
faire une alcumie. Or il y a longue distance de
l'un à l'autre. Car qu'emporte ce mot de Mérite?
C'est que Dieu s'est obligé envers nous, que nous
dirons, I'ay bien mérité ceci ou cela, i'en suis digne :
et celuy qui ne recognbist le mérite, il est ingrat
s'il ne s'acquite de son devoir envers celuy auquel
il est tenu. Si donc nous pouvons rien mériter
envers Dieu, il s'ensuyvroit qu'il seroit tenu à nous
de son costé, et qu'il nous feroit tort quand il ne
nous payeroit point de ce qu'il nous doit. Or il
est vray qu'il se fait bien nostre debteur, voire et
un debteur volontaire: car il ne trouvera rien en
nous pourquoy il nous soit obligé: mais par ses
promesses il s'oblige. Ainsi donc, de son costé il
y a salaire, lequel il nous donne gratuitement: il
n'y a point de mérite du nostre. Car c'est sauter
du coq à l'asne de venir ainsi de l'un à l'autre, et
conclure que c'est tout un de deux mots, où il y a
telle diversité. Ainsi donc, il ne se faut point esbahir
si les Papistes concluent ainsi leurs argumens
à toutes heures, et qu'ils se tempestent quand on
dit que les oeuvres ne nous peuvent iustifier. Car
eux ils présupposent une chose fausse, c'est assavoir,
que si Dieu rémunère les siens, il faut qu'il
y soit tenu, et qu'il y ait quelque dignité en eux,
et que leurs oeuvres emportent quelque mérite:
Car cela n'est rien du [pag. 193] tout. La raison
ie I'ay monstree, c'est assavoir, quand Dieu nous
a promis salaire, ce n'est pas d'autant que nous en
soyons dignes, mais c'est pouree qu'il luy plait
d'adiouter ainsi grace sur grace, et le tout de sa